Omukama Omubi Alema Misiri

ABASAIJA abo nibahambiriza abantu kukora. Dora omusaija nateera omu h’abakozi n’omwigo! Abakozi boona baali nibaruga omu maka ga Yakobo, kandi baali nibamanywa nk’Abaisareri. Abasaija abakaba nibabahambiriza kukora bakaba bali Bamisiri. Abaisareri hati bakaba bafokere bairu b’Abamisiri. Kinu kikabaho kita?

Amaka ga Yakobo agaali makoto muno, bakamara omu Misiri obusumi bwingi muno omu businge. Yusufu ayabaire musaija w’ekitiinisa muno kandi ow’akabiri hali Faraho, yabarolerraga. Baitu Yusufu obu yafiire, Faraho ondi owakaba atarukugondeza kimu Abaisareri akatandika kulema Misiri.

Hanyuma, Faraho onu akafoora Abaisareri okuba abairu rubale. Kandi akataho abasaija ababi n’abitima okubarolerra mukukora. Banu bakaba nibahambiriza muno Abaisareri okwombeka embuga za Faraho. Kyonka Abaisareri bakeyongera kukanya muno. Kinu kikatiinisa muno Abamisiri, bakatekereza ngu nibaija kuba baingi muno nokuba b’amaani muno.

Nomanya eki Faraho yakozire? Akagambira abasehenyi b’Abaisareri ati: ‘Omwana w’obwojo arazaarwa weena mumwite.’ Baitu banu bakaba baali bakazi barungi muno, batabaite.

Hanyuma Faraho akaha ekiragiro hali abantu be boona: ‘Mwite abaana boona ab’obwojo ab’Abaisareri. Abaana ab’obwisiki bonka nubo muleke bomezi.’ Kinu kikaba kitali kibi muno? Katurole omwana omu ow’obwojo nkoku yakizibwemu.