Yakobo Yatunga Amaka Makooto

DORA amaka ganu kamakooto. Banu boona bakaba batabani ba Yakobo 12. Baitu akaba aine n’abaisiki. Nomanya amabara gabu? Katubegeho.

Leya akazaara Reubeni, Simeoni, Levi na Yuda. Baitu obu Rakeri yaboine atarukusobora kuzaara, kikamubihiza muno. Hanyuma akaha Yakobo omuzana we Bira. Bira akazarra Yakobo abaana babiri, Dani na Nafutali. Na Leya nawe akaha Yakobo omuzana we Ziripa. Ziripa akazaara Gadi hamu na Aseri. Hanyuma Leya akagaruka yazaara aboojo abandi babiri, Isakara na Zeburani.

Hampero, Rakeri akazaara omwana yamuruka Yusufu. Nitwija kumwegaho bingi habwokuba akafooka muntu mukuru muno. Banu bali abaana ab’obwoojo 11 aba Yakobo, abayazaire obu akaba naikara na Labani ise wa Rakeri.

Yakobo akaba aine n’abaisiki, baitu Baibuli egambaho omu wenka. Ibara lye nuwe Dina.

Obwire bukahika Yakobo kuleka Labani agarukeyo Kanani. Akasoroza abantu be hamu n’amahyo ge ag’entaama nag’ente okutandika orugendo orw’amaani.

Hanyuma Yakobo nab’omuka ye bahikire Kanani, hakarabaho akaanya kake Rakeri yazaara omwana omwojo ondi. Orugendo Rakeri rukamubera ruzibu, kandi hanyuma akafa nazaara. Baitu omwana akaba ali mwomezi. Yakobo akamuruka Benyamini.

Nitugonza kwijuka amabara g’abatabani ba Yakobo 12 habwokuba ihanga lyoona erya Isareri nuho lyarugiire. Omu mananu, enganda 12 eza Isareri zikaruga omu batabani 10 aba Yakobo hamu n’abatabani babiri aba Yusufu. Isaka akomeera emyaka nyingi hanyuma y’okuzarwa kw’aboojo banu boona. Kuba n’abaijukuru baingi bati nikitekwa kuba kyamusemeize okutunga abaijukuru baingi batyo. Baitu katurole kiki ekyabaireho ha mwijukuru we omwisiki Dina.