Enyanjura

EKITABU kinu ky’enganikyo ez’abaireho. Zoona ziihirwe omu kitabu ekirutekebwamu ekitiinisa mu nsi yoona, Baibuli. Enganikyo nizikuha ebyafayo by’ensi kuruga Ruhanga atandika kugihanga kuhikya ha busumi bwaitu obuturumu. Nizitugambira kiki eki Ruhanga araganiize kukora mu biro ebirukwija.

Ekitabu kinu nikikwolekera kimu kiki Baibuli ekyerukugambaho. Nikigamba h’abantu ab’omu Baibuli n’ebintu ebi bakozire. Nikyoleka okunihira okw’amaani muno okw’obwomezi obutahwaho omu rugonjo omu nsi oru Ruhanga anihiize abantu.

Kirumu enganikyo 116. Zicwirwemu ebicweka munaana. Orupapura orw’okubanza ha buli kicweka nirukusoborra mu buguffu biki eby’orukwija kusanga mu kicweka ekyo. Enganikyo zitegekerwe mu mulingo nkoku zabaireho mubyafayo. Kinu nikijja kukukonyera kwega nk’oku ebintu byabaireho nibikuratana omu byafayo.

Enganikyo zitairwe murulimi orwanguhire kwetegereza. Baingi inywe abato nimwija kusobora kuzesomera inywenka. Inywe abazaire nimwija kukisanga ngu abaana baanyu abato muno nibaija kusemererwa kakuba muguma nimubasomeramu emirundi nyingi. Noija kusanga ngu ekitabu kinu kirumu ebintu bingi ebirukusemeza abato n’abakuru.

Ebyahandikirwe ebikujulizibwa kuruga omu Baibuli bitairwe ha mperu ya buli ruganikyo. Notekebwamu amaani okusoma ebicweka binu kuruga omu Baibuli nambere enganikyo zinu ziihirwe.