¿Ambejtsïni jorhendasïni ambe enga apostoli Pablu karakuapka Tesalónika anapuechani? Engachi niáraska kurhaani ambe ma engajtsïni ísku pakataaka joperu no terukuntani imani ambe jingoni engachi jorhenguarhijka Bibliarhu, jatsiskachi para jánhaskakua jingoni jámani. Ióntki jini Unión Soviética, jarhasptiksï máru kʼuiripuecha engaksï juchaari ikiatspitiipka ka axakuasptiksï karta ma juchaari erachiichani nani engaksï arhiauenga eskaksï úpiringa máteru organisasioni úkuarhini ka i karta ísï xarharasïreendi enajki Kuerpu Gobernanti axakuapi. Nájkiruka ísï xarhareenga eska karta jima uéraspka, uánikua erachiichaksï exespka eska chkuanderakua máespka. Uánikuechaksï kuenta íntskukuarhespti eska no terukuntasïreenga imani ambe jingoni enga Biblia jorhentpijka. Ka ini jurhiatikuecha jimbojtu, juchaari ikiatspitiichaksï ménichanisï mámaru ambeksï úrasïndi parajtsïni támisï jánhastani ka úni eskachi arhukurhiaka. Joperu parachi úni kuájchakukuarhini ka ‘no jámani jurajkutakuarheni parajtsïni támisï jánhastani’, jatsiskachi para exeni eska iámindu ambe engachi kurhaajka o arhintajka terukuntasïnga jurhimbikua ambe jingoni enga Biblia jorhentpijka (2 Tes. 2:2; 1 Juanu 4:1). w24.07 12, 13 párr. 14, 15

Ambe enga uéjka Tata Diosï Jeoba eska iámindu kʼuiripu uaaka, jindeesti xarhatani eska uékasïnga imani marhuakuni ka imeeri familia jingoni kuenta úkuarhini. Ka Tata Diosï Jeoba uékasïndi eskaksï iáminduecha ísï uaaka. Ístu uékasïndi eskaksï kʼuiripuecha sési pájperaaka imani jingoni ka irekanksï para méntkisï (Deut. 30:​19, 20; Gal. 6:​7, 8). Tata Diosï Jeoba no nemani obligarisïndi para imani marhuakuni, sánderu sési, jurajkusïndi eska mándani kʼuiripu erakuaka sini marhuakua o nómbe. Joperu, ¿ambe úkuarhisïni imani erachi o pirenchi jingoni enga k’eri pekadu ma újka? Petanhantasïndi kúnguarhikuarhu enga no móantaaka (1 Kor. 5:13). Ka nájkiruka nóteru kúnguarhikua jingoni kuenta úkuarhijkia, Tata Diosï Jeoba uékasïndi eska ima andarhientaaka. Tata Diosï Jeoba jimbosï íntspiti imeeri Uájpeeri tsípikuani para úni puákuantaani imeechani engaksï moántajka. Juchaari Tata Diosï kánikua xénchpesïndi jimbosï uéjti jarhuatani imeechani engaksï no sési ambe niátajka ka arhiani eskaksï moántaaka (Zac. 1:3; Rom. 2:4; Sant. 4:8). w24.08 14 párr. 1, 2

Juanu karaspti eska kurhajchani Tata Diosï Jeobani úsïnga eskachi kánikua sési pʼikuarheraaka. Jiáni enga Juanu últimu kartani karapka, máru kʼuiripuechaksï chkuanderakua ambe jorhentpixapti ka arhukuni kúnguarhikuani. Joperu jarhastiksï máteru erachiicha engaksï seguiriini japka jurhimbikuarhu jámani. Imeechaksï kurhajchaxapti Tata Diosï Jeobani ka ísïksï jámaxapti eska ima na juramukuapka (2 Juanu 4, 6). Ísï jimbo, i kristianuechaksï no solu Juanu sési pʼikuastasïreendi, sino ístu Tata Diosï Jeobani (Prov. 27:11). Jiájkani, jorhenguarhisïngachi eskachi kánikua tsípisïnga engachi kurhajchajka Tata Diosïni ka nóchi jurajkuni (1 Juanu 5:3). Juchachi kánikua tsípisïnga engachi mítejka eskachi sési pʼikuastasïnga Tata Diosï Jeobani. Ka ima kánikua sési pʼikuarherasïndi engachi kurhajchajka ka no úni imani ambe enga no sési jaka. Ka ístuksï ánjeliicha kánikua tsípisïndi engajtsïni ísï exejka (Luk. 15:10). Ka juchajtuchi kánikua tsípisïnga engachi exejka na engaksï máteru erachiicha tekaantajka (2 Tes. 1:4). Jo, jiáni enga Noambakitiiri parhakpini kʼamajkunhaakia, juchachi kánikua sési pʼikuarheraaka jimbokachi mítetini jauaka eskachi méntkisï kurhajchaska Tata Diosï Jeobani ka nóchi méni jurajkuska. w24.11 12 párr. 17, 18