Holim Stretpela Tingting Long Ol Hevi

1-2. Yumi mas mekim wanem na bai yumi ken sanap strong na winim ol hevi i painim yumi? (Lukim tu piksa.)

OLSEM WANEM? Yu wok long karim hevi bilong pasin i no stret, ol famili i birua long yu, o ol man i mekim nogut long yu bikos long bilip bilong yu? O yu wok long karim hevi long sait bilong helt o yu karim hevi bilong go lapun? O wanpela bikpela hevi i painim yu, olsem wanpela yu laikim tumas i dai? Wankain olsem planti gutpela wokman bilong Jehova, yu inap pilim olsem yu “karim planti pen na hevi” long laip bilong yu.—Sng. 90:10.

² Yumi mas holim stretpela tingting long ol hevi na bai yumi ken sanap strong na winim ol hevi i painim yumi. Hau yumi ken mekim olsem? Yumi ken tok piksa long en olsem: Ol hevi yu feisim long laip i wankain olsem ol samting i blokim rot em yu draivim kar long en. Wanem ol samting i blokim rot bai makim olsem yu mas tanim i go long left o rait o slo daun, o stop inap sotpela taim. Bilong mekim olsem, yu mas luksave long wanem samting tru i blokim rot bilong yu. Tasol yu bai hatwok long luksave klia long samting i blokim rot sapos graun malumalum o das i karamapim windo bilong yu. Olsem tasol, bilong winim ol hevi i painim yumi, yumi mas holim wankain tingting olsem bilong Jehova long dispela hevi. Long dispela atikol, yumi bai stori long (1) hau yumi ken holim stretpela tingting long ol hevi bilong yumi, (2) olsem wanem tingting kranki i ken bagarapim yumi, na (3) ol samting yumi mas mekim bilong holim stretpela tingting taim wanpela hevi i painim yumi.

HOLIM STRETPELA TINGTING LONG OL HEVI

3. Wai na yumi gat ol hevi long dispela haptaim nogut bilong nau?

³ Yumi no inap abrusim ol hevi long dispela taim nogut bilong nau. Yumi stap yet olsem ol sinman na Satan i bosim dispela graun, so yumi bai wok yet long karim ol hevi. Na tu, pinis bilong dispela haptaim nogut bilong nau i kam klostu tru, so hevi bai painim yumi olgeta, maski em ol netrol disasta o ol hevi ol man i kamapim o ol hevi i kamap long ol pasin nogut ol man i mekim. (Mat. 24:8; 2 Tim. 3:13) Sapos Jehova i stretim olgeta hevi long nau, bai i luk olsem em i helpim Satan long bosim dispela graun. Long dispela haptaim bilong nau, yumi no inap abrusim ol hevi na ol bagarap i laik painim yumi.—Ekl. 9:12.

4. Ol Kristen i save bungim wanem narapela hevi tu?

⁴ Ol Kristen i karim ol narapela hevi tu. Planti taim Jisas i tokim ol disaipel bilong em olsem ol man bai mekim nogut long ol bikos long bilip bilong ol. (Mat. 24:9; Jon 16:2) Yumi save long dispela, olsem na yumi no pundaun long bilip taim ol hevi i painim yumi. (1 Tes. 3:​3, 4) Taim yumi sanap strong na karim ol hevi bikos yumi gat strongpela bilip, dispela i ken helpim yumi long save tru olsem yumi wok long wokabaut long dispela rot i go long laip oltaim. Na tu, yumi soim olsem yumi stap long sait bilong Jehova long dispela bikpela tok Satan i bin sutim long em. Satan i laik bagarapim nem bilong God, olsem na em i tok olsem ol man i mekim wok bilong God bikos long ol samting ol i kisim long em. Na bilong kamapim klia olsem tok em i mekim i tru, em i wok strong tru long mekim nogut long lain bilong Jehova. (Jop 1:​9-11) Yumi sanap strong bikos yumi laikim Jehova na yumi laik amamasim em.—Prov. 27:11.

5. Yumi inap kisim wanem skul long tok bilong Eklisiastis 7:​13, 14? (Lukim tu ol piksa.)

⁵ Jehova i save larim ol hevi i painim yumi. Jehova i no save mekim ol pasin nogut na em i no save kamapim ol samting nogut bilong traim yumi. (Jems 1:13) Tasol King Solomon i tok “de bilong bikpela hevi i kamap” em “ol wok bilong God tru.” (Ritim Eklisiastis 7:​13, 14.) Tok bilong em i no makim olsem Jehova i mekim ol dispela samting i kamap, ol dispela samting i kamap bikos God i larim ol i kamap. Solomon i givim gutpela edvais bilong helpim yumi long holim stretpela tingting long ol hevi i painim yumi. Namba 1, yumi mas luksave olsem yumi no gutpela olgeta na yumi stap long graun em Satan i bosim, so sampela taim bai yumi gat ol gutpela de na sampela taim ol de nogut. Taim yumi gat ol gutpela de, yumi mas soim tenkyu bilong yumi long ol gutpela pasin bilong God na tingim dispela de olsem presen i kam long em. Namba 2, Solomon i laik kirapim yumi long tingim olsem yumi “no inap save stret long ol samting bai i kamap,” maski de bilong yumi em bai gutpela o em bai nogut. Ol hevi yumi no ting long en i save painim ol gutpela man na ol man nogut wantaim.

6. Wai na Jehova i larim yumi karim ol hevi? (Hibru 12:​7, 11)

⁶ Sapos yumi holim stretpela tingting long ol hevi bilong yumi, yumi bai lukim olsem Jehova i laik skulim yumi long bilip na wetim em i helpim yumi na yumi no ken bilip long strong bilong yumi yet. Oltaim Jehova i save lukim ol hevi i painim yumi na em i save tingim tru ol pen na hevi yumi karim. So taim em i larim yumi wokabaut long “veli i tudak nogut tru,” em bai wok yet long stiaim yumi, na soim olsem em i laikim yumi, na givim yumi strong yumi nidim bilong sanap strong. (Sng. 23:4) Ol hevi i painim yumi inap helpim yumi long luksave long sampela pasin kranki bilong yumi em yumi mas stretim, na God bai helpim yumi na yumi ken stretim ol dispela pasin. (Ritim Hibru 12:​7, 11.) Olsem, Jop i gat wok long kisim pasin daun. Jehova i no kamapim ol hevi i painim Jop, tasol em i larim ol dispela hevi long kamap na em i yusim dispela long skulim Jop long sampela bikpela samting. (Jop 42:​1-6) Taim ol narapela narapela hevi i painim yumi, yumi ken save olsem Jehova i larim ol dispela hevi i kamap long yumi na em i no inap larim ol dispela hevi i stap oltaim oltaim. Taim yumi sanap strong long ol hevi i painim yumi, “yumi save winim tru olgeta dispela samting.”—Rom 8:​35-39.

7. Wai na yu ken amamas yet taim ol man i mekim nogut long yu bikos long bilip bilong yu?

⁷ Yumi ken amamas long taim ol man i mekim nogut long yumi. Sapos ol man i mekim nogut long yu bikos long bilip bilong yu, no ken ting olsem Jehova i no orait long yu, nogat. Kain pasin birua olsem i soim olsem Jehova i orait long yu. (Mat. 5:​10-12) So taim yu holim stretpela tingting long ol hevi, yu ken amamas yet na holimpas gutnem bilong yu taim ol man i mekim nogut long yu olsem wanpela Kristen, wankain olsem ol aposel long bipo i bin mekim. (Apo. 5:​40-42) Na tu, yu inap helpim ol man i no Witnes long kisim save long God na “givim glori long God.” (1 Pita 2:12) Wankain olsem Josep, yu ken amamas long taim yu wok long karim hevi, na tu, long taim ol hevi i pinis.—Stt. 39:​3, 23.

8. I gat wanem narapela risen na yumi mas sanap strong na karim ol hevi i painim yumi?

⁸ Ol hevi bilong yumi bai pinis. Ol samting i painim Jop i ken helpim yumi long tingim olsem ol hevi bilong yumi bai pinis. Baibel i tok: “Jehova i mekim gut moa yet long Jop long laspela hap bilong laip bilong em winim tru laip bilong em long bipo.” (Jop 42:12) Wankain olsem Jop, Jehova i promis long blesim yumi long “laspela hap bilong laip” bilong yumi, em hap bilong laip we yumi bai stap laip oltaim oltaim winim dispela fes hap bilong laip bilong yumi we i sotpela na i pulap long pen na hevi tasol. Em gutpela risen tru long yumi olgeta wan wan i sanap strong i go inap long pinis!—Mat. 24:13.

TINGTING KRANKI INAP BAGARAPIM YUMI

9. Olsem wanem tingting kranki inap bagarapim yumi?

⁹ Maski wanem ol hevi i painim yumi, yumi mas holim stretpela tingting na bai yumi no ken kamapim sampela moa hevi. Olsem, ating yumi inap pilim olsem Jehova i kamapim ol hevi i painim yumi. Inap sampela haptaim Jop i bin ting olsem Jehova i kamapim ol hevi i painim em, na dispela i kirapim em long “strong olsem em yet i stretpela man na pasin bilong God i no stret.” (Jop 32:2) Wankain samting i painim Naomi, em i bin ting olsem Jehova i kamapim ol hevi i painim em. (Rut 1:​13, 20, 21) Sapos Jop na Naomi i bin holim strong kain tingting kranki olsem, dispela inap bagarapim pasin pren bilong ol wantaim Jehova. (Prov. 19:3) Tasol Jehova i helpim ol long holim stretpela tingting long ol hevi bilong ol na em i blesim pasin bilong ol long stap gut long em.

10. Taim wanpela hevi i painim yumi, yumi inap kirap long holim wanem tingting?

¹⁰ Maski yumi save olsem Jehova i no kamapim ol hevi bilong yumi, ating yumi inap kirap long holim tingting olsem tru tru em i save tingim yumi, o nogat. Kain tingting kranki olsem inap pinisim strong bilong yumi. (Prov. 24:10) King Devit na profet Habakuk i bin karim ol hevi na sampela taim ol i askim olsem Jehova i harim singaut bilong ol o nogat. (Sng. 10:1; Hab. 1:2) Tasol dispela i no pasim ol long beten. Jehova i mekim gutpela tok bilong strongim ol dispela gutpela man olsem em bai sapotim ol na em bai mekim wankain long yu tu.—Sng. 10:17.

11. Wanem samting inap painim yumi sapos yumi no holim stretpela tingting long ol hevi bilong yumi?

¹¹ Sapos yumi no holim stretpela tingting long ol hevi i painim yumi, yumi inap kirap nogut long ol dispela hevi na pilim olsem ol kain hevi olsem i no ken painim yumi. (1 Pita 4:12) Ol disaipel bilong Jisas i hatwok long kliagut olsem ol man i mas birua long Jisas na kilim em i dai. (Luk 18:​33, 34) Maski Jisas i tokaut klia long wanem samting bai painim em, aposel Pita i mekim tok we i soim olsem God i no inap larim dispela samting i kamap long Jisas. Jisas i save olsem kain tingting olsem bai pasim laik bilong Jehova long kamap so em i krosim Pita. (Mak 8:​31-33) Na tu, bihain long Jisas i dai, ol disaipel bilong em i no kliagut long ol samting i kamap. Maski i olsem, Jisas i no givap long ol. Taim em i toktok long ol bihain long em i kirap bek, em i helpim ol long holim stretpela tingting long ol pen na hevi i painim em long rot bilong “kamapim gut ol tok bilong Rait Holi.” (Luk 24:​25-27, 32, 44-48) Taim ol disaipel i tingim tingim long bel ol tok Jisas i skulim ol long en, dispela bai helpim ol long redi long pasin birua bai painim ol klostu taim olsem ol disaipel bilong Jisas. Taim yumi skelim gut ol tok i tru bilong Baibel, dispela bai helpim yumi tu long redi long ol hevi bai painim yumi.

12. Taim yumi gat tingting kranki long wanpela hevi, dispela inap mekim yumi pilim olsem wanem?

¹² Taim yumi holim tingting kranki long wanpela hevi i painim yumi, yumi inap pilim olsem dispela hevi i bikpela tumas, tasol tru tru hevi i no bikpela tumas. Jisas i soim hau kain samting inap kamap long wanpela tok piksa em i mekim long ol wokman long wanpela gaden wain. Sampela wokman i bel hevi bikos ol i no kisim pe em ol i ting ol bai kisim, tasol bosman i tokim wanpela bilong ol olsem: “Pren, mi no mekim rong long yu.” (Mat. 20:​10-13) Ol dispela wokman i no komplein bikos bosman i mekim pasin i no stret long ol, nogat, ol i komplein bikos ol i ekspektim samting em ol i no gat rait long kisim. Long nau, sampela bratasista i pilim wankain olsem taim ol i no kisim wanpela asainmen ol i laikim o taim ol i mas lusim wanpela asainmen ol i laikim. Yumi ken mekim wanem bilong holim stretpela tingting long wanpela hevi i givim hatwok long yumi?

OL SAMTING YUMI KEN MEKIM TAIM HEVI I PAINIM YUMI

13. Wanem samting inap kamap taim wanpela hevi i painim yu?

¹³ Yu save long ol tok i tru bilong Baibel we i stori long ol hevi. Na ating yu bin serim ol dispela tok i tru wantaim ol narapela bilong helpim ol long karim hevi bilong ol. Tasol taim wanpela bikpela hevi i painim yu yet, ating yu inap pilim hatwok long holim stretpela tingting. Olsem, yu inap pilim olsem Jehova i givim strafe long yu o em i no wok long harim ol beten bilong yu. Yu ken mekim wanem ol samting na bai yu holim stretpela tingting?

14. Yu inap beten long wanem ol samting taim yu karim pen na hevi? (Filipai 4:13)

¹⁴ Askim Jehova long helpim yu. Tokim Jehova long ol pen na hevi bilong yu na samting dispela i mekim long yu. Yu ken beten na kolim stret samting yu laik bai Jehova i mekim bilong helpim yu. Yu ken askim em long givim holi spirit bilong em long yu bilong strongim yu na savetingting yu nidim bilong sanap strong. Tingim, Jehova inap bekim beten bilong yu long rot we yu no ting long en. (Efe. 3:20) Na em inap stiaim ol ensel na ol bratasista long helpim yu. (Sng. 34:7) So redi long kisim helpim Jehova i givim yu long narapela narapela rot. Em i save redi long givim holi spirit bilong em na dispela inap helpim yu long sanap strong na feisim wanem ol hatwok yu bungim.—Ritim Filipai 4:13.

15. Wanem samting bai helpim yu long sanap strong na karim hevi? (Lukim tu piksa.)

¹⁵ Wok yet long mekim ol samting bilong strongim pasin pren bilong yu wantaim Jehova. Wok strong long mekim ol samting yu inap mekim long nau bilong pas gut wantaim God, maski yu no inap mekim olgeta samting olsem yu save mekim long bipo. Yu mas pulapim tingting bilong yu wantaim ol tingting bilong God na moa yet long taim yu karim “pen na hevi.” (Sng. 119:143) Wok yet long ritim Baibel long olgeta taim, stadi long ol tok bilong en, na tingim tingim long bel. Na givim bel tru long mekim wok autim tok, go long ol miting bilong kongrigesen, na insait tu long bekim tok long ol dispela miting. Na lusim haptaim long stap na toktok wantaim ol bratasista bilong yu. Na sakim dispela laik bilong pilim olsem yu laik stap yu yet tasol.—Prov. 18:1.

16. Yu inap holim tupela tingting long wanem ol samting taim hevi i painim yu, na olsem wanem yu ken daunim ol dispela tingting? (2 Korin 10:​4, 5)

¹⁶ Yusim Baibel long stretim tupela tingting bilong yu. Taim wanpela hevi i painim yu, yu mas “daunim ol samting i gat strong” em ol tingting kranki, na wanpela bilong ol em pasin bilong holim tupela tingting long yu yet na long Jehova. (Ritim 2 Korin 10:​4, 5.) Yu ken stretim tingting bilong yu long rot bilong yusim “save bilong God” em yu kisim long Baibel na long ol pablikesen em oganaisesen bilong Em i kamapim. Olsem, sampela taim yu gat tupela tingting olsem Jehova i no orait long yu? Sapos olsem, orait stadi long ol ekspiriens bilong aposel Pol. Taim em i mekim wok autim tok, em i karim planti hevi tru, tasol ol dispela hevi i strongim bilip bilong em olsem God i orait long em olsem wanpela wokman bilong Krais. (2 Kor. 11:​23-27) Sampela taim yu tingting planti olsem tru tru Jehova i fogivim yu long ol sin yu bin mekim long bipo? Sapos olsem, raitim lista bilong ol skripsa we i soim olsem Jehova i save fogivim ol sin bilong yumi. (Ais. 43:25) Na bihain ritim gen ol dispela ves na tingim tingim long bel. (Sng. 119:97) Olsem wanem? Wanpela bikpela hevi i bin painim yu na yu kwestenim olsem tru tru Jehova i save truim tok promis bilong em long lukautim ol wokman bilong em? Sapos olsem, mekim wok painimaut long ol topik long wai na God i larim pen na hevi i stap na hau em i save lukautim yumi long sait bilong bilip taim ol hevi i painim yumi. (Sng. 91:​9-12) Na tu, ritim stori bilong ol bratasista em ol bin sanap strong taim ol bikpela hevi i painim ol.a

17. Yumi ken mekim wanem taim wanpela bikpela hevi i painim yumi?

¹⁷ Olsem wanem? Ol samting long laip bilong yu long nau i olsem gutpela de na i no gat bikpela hevi tumas? Sapos olsem, orait tok tenkyu long Jehova na yusim gut dispela haptaim long tingim ol gutpela pasin bilong em. (Ekl. 7:14) Tasol taim wanpela bikpela hevi i painim yu, wok yet long holim stretpela tingting long dispela hevi na wok yet long trastim tru Jehova. Taim yu mekim olsem Jehova ‘bai wokim rot bilong helpim yu na bai yu ken sanap strong na traim i no inap daunim yu.’ (1 Kor. 10:13) Tasol olsem wanem long ol bratasista bilong yumi? Hau yumi ken helpim ol taim wanpela bikpela hevi i painim ol? Atikol i kamap bihain bai stori long dispela.