Jehova i Trenim Mi Taim Mi Yangpela Yet

Bai mi stori pastaim long laip bilong mi taim mi liklik yet. Mi bon long haptaim bilong Wol Woa 2 long Calgary, Kanada. Klostu 75 yia i go pinis, wanpela yangpela painia nem bilong em Donald Fraser, em i kam paitim dua long haus bilong mipela na mama i tok orait long stadi long Baibel. Em i laikim tru tok i tru, tasol em i gat hevi long helt bilong em, na dispela i pasim em long go long ol miting bilong kongrigesen na autim tok samting. Maski i olsem, em i winim mak na em i kisim baptais long 1950. Tasol sori tru, em i baptais i no winim tupela yia yet na em i dai. Long dispela taim, papa em i no wanpela Witnes yet, tasol em i orait long ol Witnes i ken mekim fiuneral sevis bilong mama.

Sampela de bihain long fiuneral, wanpela lapun sista nem bilong em Alice, em i wanpela bilong ol Kristen em God i bin makim, em i invaitim mi long go long wanpela miting bilong kongrigesen. Em i save long mi bikos mi save go long ol miting long wiken wantaim mama taim helt bilong mama i gutpela na em inap go long ol miting. Mi askim papa sapos mi ken go long miting. Em i tok orait na em i tok em bai kam wantaim mi long dispela wanpela taim tasol bikos em i laik tok tenkyu long brata husat i bin mekim tok long fiuneral sevis bilong Mama. Long dispela nait, ol i mekim Skul Tiokratik Bilong Autim Tok na Miting Bilong Wok Autim Tok. Dispela em gutpela taim stret long papa i kam long fes miting bilong em. Em i bin go long skul bilong lain long pasin bilong toktok gut long ai bilong pablik na em i kirap nogut tru long ol tok em i bin harim long miting. Bihain long dispela, papa i kam long harim tok bilong dispela hap bilong miting long olgeta wik. Na isi isi em i kirap long kam long ol narapela miting tu.

Long dispela taim bipo, brata i lukautim Skul Tiokratik Bilong Autim Tok i save kirapim miting long rot bilong kolim nem bilong ol brata i insait long dispela skul na olgeta wan wan i save bekim olsem, “Mi stap.” Wanpela nait, mi askim dispela brata long kolim nem bilong mi long neks miting. Em i tok amamas long mi, tasol em i no askim mi sapos mi kliagut long samting mi askim em long en.

Mi no luksave olsem mi volantia long mekim ol tok long dispela skul, long tingting bilong mi, mi laik tasol long ol bai kolim nem bilong mi na ol narapela i harim! Long wik antap, ol i kolim nem bilong mi na mi amamas wantaim na mi tok, “Mi stap.” Bihain long miting, ol brata i tok amamas long mi. Sampela wik bihain, ol i givim mi asainmen bilong mekim tok olsem mi bin stori long en long kirap bilong dispela atikol.

Mi pret nogut tru! Long dispela taim bipo, ol sumatin i mas redim tok em longpela bilong en inap 6 i go 8-pela minit. I no gat asainmen bilong Baibel ritim tasol. Papa i helpim mi long redim dispela tok na em i tokim mi long mekim prektis inap 20 taim paslain long mi mekim dispela tok long skul. Bihain long mi mekim tok, mi kisim gutpela tok kaunsel bilong helpim mi. Insait long ol yia i kam na i go, Jehova i trenim mi long rot bilong papa bilong mi, ol gutpela bratasista, na long rot bilong oganaisesen bilong Em.

MI KISIM TRENING YET

Alice, em mi stori long em pinis, em i trenim mi taim mi kirap long insait long wok autim tok. Long dispela taim, ol i save kirapim mipela long ritim 3-pela skripsa long man bilong haus na bihain tilim wanpela buk long em. Long taim mi mas toktok long man bilong haus, Alice i save introdusim em yet na bihain em i save tokim mi long ritim fes skripsa. Bihain, mi save kontiniu long stori wantaim man bilong haus, ritim namba 2 na namba 3 skripsa, na tilim pablikesen long em. Bihain, mi lain long introdusim mi yet long taim mipela i go autim tok. Bihain long papa i kisim baptais long pinis bilong 1954, em i save helpim long givim mi trening long pasin bilong autim tok. Maski mama i no stap, papa i mekim olgeta samting em inap mekim bilong helpim mi long laikim tru Jehova. Ol miting na wok autim tok ol i bikpela samting tru long papa na em i no save lusim ol dispela wok lotu. Mi save pinis long samting mipela bai mekim long miting na long ol Sarere na Sande moning.

Mi no gutpela tumas long lainim ol samting long skul, tasol sampela trening mi kisim insait long 12-pela yia mi bin go long skul, dispela i bin helpim mi long laip olgeta bilong mi. Olsem, mi lain gut long edim ol namba. Na tu, hau long mekim gut Tok Inglis. Ol klas mi kisim bilong lainim gut Tok Inglis na ol skul mi bin kisim long raitim gut ol stori i helpim mi tru long asainmen nau mi gat wantaim Writing Department.

Planti taim ol narapela i save askim mi long wai na mi laikim musik. Papamama bilong mi i bin laikim tru musik. Taim mi gat 7-pela krismas, mi lain long pilaim piano inap liklik haptaim, tasol tisa bilong mi i tokim mi olsem mi no save pilaim gut piano. Em i tokim papa olsem mobeta mi stop long lain long pilaim piano. Mi kliagut long risen na em i tok olsem bikos long dispela taim, mi tu no gat intres long pilaim piano.

Sampela mun bihain, papa i painim narapela tisa. Nau mi wok long lain long pilaim piano na hau long singsing gut, na mi mekim gut tru. Mi save singim soprano, na mi gat gutpela nek na mi winim sampela kompetisen. Mi putim mak long stadim musik, kisim digri na dispela bai opim rot long mi ken skulim ol narapela long musik na sapotim mi yet taim mi mekim wok autim tok fultaim. Klostu long taim mi bai kisim digri bilong mi, mi luksave olsem mi bai lusim bikpela haptaim tru long stadim musik, na stadi tu long ol eksem. So mi wokim disisen long lusim skul na mi kamap painia oltaim. Mi mekim olsem long 1963.

WOK PAINIA I GIVIM MI AMAMAS

Bihain long mi mekim wok painia inap wanpela yia, ol i salim mi olsem spesel painia i go long Kapuskasing, Ontario. Painia poroman bilong mi em Daniel Skinner, em i gat bikpela krismas moa winim mi. Em i skulim mi long hau ol samting i save ron insait long ol kongrigesen. Ol i makim mi long insait long Kongrigesen Sevis Komiti taim mi gat 20 krismas, so i gat planti samting em mi mas lainim. Mi amamas tru olsem long nau oganaisesen i strongim tru pasin bilong trenim ol yangpela brata. Sapos ol i soim olsem ol i amamas long mekim wok, orait maski ol i yangpela yet, Jehova inap yusim ol long mekim planti bikpela wok!

I gat sampela hatwok em mipela i bungim long Kapuskasing. Long taim bilong winta, sampela taim tempresa i save go daun tru na ples i kol nogut tru. Planti taim mitupela Dan i save wokabaut i go long ol teritori. Tasol wanpela samting mi amamas tru long en long dispela asainmen em mi bungim wanpela sista nem bilong em Linda Cole, bihain nem bilong em i senis i go long Linda Splane.

Linda em wanpela pablisa i save givim bel tru long autim tok na em i gat planti gutpela gobek. Em i gat naispela pasin na em i save helpim ol narapela, na em i gat pasin bilong toktok gut wantaim ol narapela. Mama bilong em Goldie, em i wanpela sista i stap strong long bilip. Pastaim, papa bilong em Allen i bin birua long tok i tru. Maski i olsem, oltaim Goldie i save bringim Linda na tupela brata bilong em John, na Gordon i go long Haus Kingdom na em i trenim ol long pasin bilong autim tok. Goldie, Linda, John, na Gordon, olgeta i bin painia long sampela taim long laip bilong ol. Planti yia bihain, Allen i kisim tok i tru na em i save sapotim gut kongrigesen bilong em.

Long 1965, ol i invaitim mi long kisim wanpela kos long Skul Bilong Wok Kingdom long Kanada Betel inap wanpela mun olgeta. Long dispela skul, ol i singautim mi long pulapim wanpela aplikesen bilong go long Skul Gileat. Mi no bin tingting long mekim wok misineri, mi pilim olsem mi no inap long mekim dispela wok, tasol mi pulapim dispela aplikesen. Ol i invaitim mi long go long namba 42 klas bilong Skul Gileat. Long Gileat, oltaim ol instrakta i save raitim ol ripot bilong olgeta wan wan sumatin. Long fes ripot mi kisim, ol instrakta i strongim mi long lainim olgeta samting long oganaisesen taim mi stap long dispela skul. Dispela em gutpela tok kaunsel stret long wanpela brata i gat 21 krismas long kisim.

Wanpela bilong ol kos mipela i kisim long Skul Gileat em ol i lainim mipela long hau long wok gut wantaim ol midia lain, olsem ol redio stesin, televisen stesin, na ol niuslain. Mi laikim tru dispela kos. Mi no luksave olsem dispela kos bai helpim mi gut tru long bihain, bai mi stori moa long dispela.

GO LONG SENEGAL

Sampela de bihain long mipela i grediuet, Michael Höhle, em poroman bilong mi long mekim wok misineri, mitupela i go long asainmen bilong mipela long Senegal, Afrika. Long dispela taim, i gat olsem 100 pablisa tasol long dispela kantri.

Mi stap long asainmen bilong mi inap sampela mun na ol i invaitim mi long wok long brens ofis long wanpela de insait long wanpela wik. Brens ofis em wanpela rum tasol long haus misineri. Dispela bilding em i no bikpela bilding, tasol Emmanuel Paterakis, em brens sevan long dispela taim, oltaim em i save tokim mi olsem brens i makim oganaisesen bilong Jehova long dispela kantri. Wanpela taim, Brata Paterakis i tokim mipela long raitim wanpela leta bilong strongim olgeta misineri. Mipela i mas yusim taipraita long taipim olgeta leta bilong olgeta wan wan misineri bikos i no gat masin we mipela i ken taipim wanpela leta na mekim ol kopi. Dispela em bikpela wok tru long mekim bikos sapos mipela i mekim popaia, i no gat rot long mipela i klinim o rausim ol tok long pepa!

Long dispela apinun yet, mi wok long redi long go long haus misineri em mi stap long en na Brata Paterakis i givim mi wanpela envelop. Em i tok: “David, Sosaiti i raitim pas long yu.” Taim mi opim dispela envelop, mi lukim wanpela bilong ol dispela leta em mi bin taipim! Dispela ekspiriens i skulim mi long rispektim oganaisesen maski brens mipela i mekim wok long en em i bikpela o liklik.

Mi kamap gutpela pren bilong planti pablisa long kongrigesen na klostu olgeta Sarere apinun mi save spendim taim wantaim ol famili em ol asples lain. Em ol taim we mi amamas tru! Long nau, mipela i save kontektim yet narapela narapela. Na mi yusim save mi gat long mekim tokples Frans long toktok wantaim ol narapela taim mi visitim ol brens long ol narapela hap bilong graun.

Long 1968, mitupela Linda i engeij. Sampela mun bihain, mi traim long painim pat-taim wok na bai mitupela Linda i ken painia wantaim long Senegal, tasol ol kampani long hap i save haiarim tasol ol asples lain na i no ol man bilong narapela kantri. So mi go bek long Kanada, na long hap mi na Linda i marit na mipela i kisim asainmen olsem ol spesel painia long Edmundston, New Brunswick, em wanpela liklik taun long boda bilong Quebec.

MEKIM WOK PAINIA LONG NEW BRUNSWICK NA QUEBEC

I no gat ol pablisa long taun na i gat sampela Baibel stadi tasol. Lotu Katolik i bosim klostu olgeta samting long laip bilong ol manmeri. Klostu olgeta haus i gat dispela sain olsem Ol Witnes Bilong Jehova i No Ken Kam Long Dispela Haus. Long dispela taim bipo, i no gat strongpela tok long yumi mas rispektim ol kain sain, olsem yumi save mekim long nau, so mipela i save go long olgeta haus, maski i gat sain o no gat. Long olgeta wik, oganaisesen bilong lotu Katolik i save putim wanpela toksave long niuspepa, we tok: “Yumi go painim ol Witnes Bilong Jehova na rausim ol long hia.” I gat 4-pela Witnes tasol long taun, em Victor na Velda Norberg na mitupela Linda, so mipela i save dispela toksave i makim mipela tasol!

Mi no inap lusim tingting long fes visit bilong wasman sekit. Em i stap wantaim mipela inap wanpela wik, na em i tok: “Ating samting em yupela i ken mekim taim yupela i stap long hia, em long helpim ol man long senisim tingting ol i gat long ol Witnes Bilong Jehova.” Kirap long dispela taim na i go, mipela i tingting strong long mekim olsem na gutpela samting i kamap! Isi isi ol manmeri i luksave olsem ol Witnes Bilong Jehova i gat pasin daun, na ol i no wankain olsem ol bikman bilong lotu Katolik em ol i gat pasin antap. Nau i gat wanpela liklik kongrigesen long dispela taun.

Mipela i stap wanpela yia long dispela asainmen i stap ausait long taun, na bihain ol i invaitim mipela long sapotim wanpela bikpela kongrigesen long Quebec City. Mipela i stap 6-pela mun wantaim ol bratasista em ol i lukautim gut mipela na bihain ol i invaitim mipela long insait long wok sekit.

Inap 14 yia, mipela i mekim wok sekit long provins bilong Quebec. Em ol gutpela taim tru! Gutpela samting i kamap long wok long Quebec, olsem na planti taim mipela i save lukim sampela famili long seim kongrigesen i wok long winim ol mak bilong kisim baptais!

TINGIM OL LAIN I BIN WOK HAT TRU

Em isi tru long laikim ol bratasista long Kanada em ol i save mekim tokples Frans. Ol i gat pasin bilong tokaut stret long ol samting, ol i save amamas, na givim bel long mekim wok. Tasol long planti bilong ol, em i no isi long ol i kisim tok i tru, na famili i save birua nogut tru long ol. Sampela yangpela em papamama bilong ol i no Witnes i tok strong long ol olsem: “Yu mas stop long stadi wantaim ol Witnes Bilong Jehova o yu mas lusim haus!” Planti bilong ol i stap gut long Jehova maski famili bilong ol i birua tru long ol. Jehova i amamas tru long ol dispela yangpela!

Mi laik stori tu long ol painia oltaim na ol painia salim em ol i bin mekim wok long Quebec insait long ol dispela yia, ol i sapotim gut tru wok autim tok. Planti bilong ol i kam long ol narapela hap bilong Kanada. Ol i bin lainim gut tokples Frans, na tu, ol i lainim pasin, tingting, na kalsa bilong ol manmeri long dispela hap em lotu Katolik i bin stiaim tru tingting bilong ol.

Planti taim ol i save salim ol spesel painia i go long ol longwe teritori we i no gat ol pablisa long en. Ol man i birua long ol, olsem na i hatwok long ol i painim ples slip, na tu, i hatwok moa long painim pat-taim wok. Ol nupela marit i mas stap long wanpela haus we i gat inap olsem 6 i go 8-pela manmeri so ol i ken serim rent bilong haus. Ol i no inap long stap ol yet. Ol dispela painia i givim bel tru long sapotim wok autim tok. Taim ol i kirapim wanpela Baibel stadi, ol i save givim bel tru long helpim sumatin bilong ol. Long nau, Quebec i gat planti pablisa, olsem na planti painia i go long ol ples we i gat bikpela nid moa long sapotim wok autim tok.

Long ol kongrigesen em mipela i bin stap long en, taim mipela i mekim wok sekit, planti taim mipela i save traim long wok wantaim ol tineja long ol Sarere moning. Dispela i opim rot long mipela inap kliagut long ol hatwok em ol i wok long bungim. Sampela bilong ol dispela tineja em mipela i bin autim tok wantaim, nau ol i mekim wok olsem ol misineri o ol i mekim wok long ol narapela kantri.

Long dispela taim bipo, sampela kongrigesen i no inap bekim bek mani em mipela i yusim long travel, so sampela taim mani bilong mipela i save sot taim mun i no pinis yet. Long ol kain taim olsem, mipela i save bilip na wet long Jehova, long wanem, em wanpela tasol i save long ol samting mipela i sot long en. Em i save helpim mipela long olgeta taim. Olsem na mipela inap long travel long wanpela kongrigesen i go long narapela.

OL SKUL MI KISIM LONG OL BRATA I STRONG LONG BILIP

Mi stori pinis long helpim mi kisim long Skul Gileat long taim ol i lainim mipela long hau long toktok long ol midia lain. Long dispela taim long Quebec, i gat planti rot em mipela inap givim gutpela witnes long rot bilong redio, televisen, na long rot bilong nius. Planti taim ol i makim mi long wok wantaim Léonce Crépeault, em narapela wasman sekit, na em i save gut long pasin bilong toktok wantaim ol midia lain. Taim mipela i go bungim wanpela bikman bilong wanpela nius kampani, em i no save traim long soim save bilong em, so em i save tok: “Bikman, mi na wanwok bilong mi, mipela ol wokman bilong God. Mipela i no save long planti samting long sait bilong nius na redio samting. Tasol ol i givim mipela wok long tokaut long ol manmeri olsem ol Witnes Bilong Jehova bai mekim wanpela bikpela kibung. Na wanem helpim yu givim long mipela, mipela bai amamas tru long en.” Dispela kain pasin daun i opim rot long mipela inap kisim gutpela helpim long ol midia lain em mipela i wok wantaim ol.

Bihain, brens i makim mi long wok wantaim Brata Glen How, em wanpela loya bilong mipela, long wok long ol bikpela keis em planti ol niuslain na redio stesin i laik stori long pablik long dispela. Trening mi kisim long Gileat na ekspiriens mi kisim taim mi wok wantaim Brata Léonce i helpim mi tru. Mi amamas tru long wok wantaim Brata How. Em i no save pret o surik taim em i toktok wantaim ol bikman bilong ligol sistem, tasol bikpela samting moa em i wanpela wokman bilong God. Em i laikim tru Jehova.

Long 1985, ol i makim mipela long mekim wok long wanpela sekit klostu long ples bilong papa bilong mi long hap wes bilong Kanada, na long dispela rot mipela inap lukautim em. Em i dai 3-pela mun bihain long dispela. Mipela i wok yet long mekim wok long ol sekit long hap wes bilong Kanada i go inap long 1989 taim mipela i kirap nogut olsem ol i singautim mipela long insait long Betel famili long Amerika. Dispela i makim olsem mipela i mas lusim wok sekit em mipela i bin mekim inap klostu 19 yia. Insait long ol dispela yia, mipela i bin stap long planti handret haus na mipela i serim planti tausen kaikai wantaim ol bratasista em ol i lukautim gut tru mipela. Mipela i tenkyu tru long olgeta bratasista em ol i larim mipela i stap long haus bilong ol, sindaun long tebol wantaim ol, na kaikai wantaim ol!

MIPELA I MUV I GO LONG AMERIKA

Taim mipela i go kamap long Brooklyn, ol i makim mi long wok long Service Department. Oltaim mi bai tenkyu long trening mi bin kisim long dispela hap. Wanpela gutpela skul mi kisim em olsem, mi mas kisim gut olgeta infomesen na mi no ken hariap long ting olsem mi save long olgeta samting. Na long 1998, ol i makim mi long wok long Writing Department, na mi wok yet long lain long raitim gut ol tok. Inap sampela yia, mi amamas long helpim Brata John Barr, em kodineta bilong Writing Committee. Oltaim mi bai tingim gut trening mi bin kisim na haptaim mi spendim wantaim em. Em i wanpela gutpela brata husat i wok strong long bihainim pasin Kristen.

Mi amamas tru long wok gut wantaim ol bratasista long Writing Department, em ol i gat pasin daun. Ol i save beten paslain long ol i mekim ol asainmen bilong ol na ol i luksave olsem olgeta gutpela samting ol i mekim em bikos holi spirit bilong Jehova i bin helpim ol na i no bikos long save ol i gat.

Mitupela Linda i kisim gutpela blesing tru long visitim ol bratasista i stap gut long Jehova na ol i mekim wok long 110 kantri. Mipela i pilim tru pasin laikim bilong ol misineri, ol brata insait long Brens Komiti, na ol narapela bratasista i insait long fultaim sevis. Mipela i pilim tru pasin bilong ol asples bratasista em ol i givim bel tru long sanap strong na stap gut long God na ol i putim wok bilong Kingdom i stap nambawan, maski ol i bungim hevi bilong woa, ol hatwok bilong mani, na pasin birua. Tru tumas, Jehova i laikim tumas ol dispela bratasista!

Insait long ol yia i go pinis, Linda i stap olsem gutpela helpim bilong mi taim mi wok long mekim ol asainmen bilong mi. Em i save laikim tru ol narapela, na oltaim em i painim ol rot bilong helpim ol. Na tu, em i gat gutpela pasin bilong kirapim toktok wantaim ol narapela. Em i bin helpim planti manmeri long kisim save long Jehova na sampela bilong ol i bin lusim pasin bilong kam long ol miting na insait long wok autim tok. Linda i gutpela presen i kam long Jehova! Nau krismas bilong mitupela i wok long i go antap, na mitupela i tenkyu tru olsem mipela inap kisim helpim bilong ol yangpela bratasista em ol i save helpim mipela long stretim ol travel arensmen bilong mipela na ol narapela helpim em mipela i nidim.—Mak 10:​29, 30.

Taim mi lukluk i go bek long 80 yia mi bin mekim wok bilong Jehova, mi amamas tru. Mi wanbel long tok bilong man bilong raitim song, em i tok: “O God, yu bin skulim mi kirap long taim mi yangpela yet, na i kam inap long nau, mi save tokaut yet long ol gutpela wok bilong yu.” (Sng. 71:17) Mi tingting strong long mekim olsem taim mi stap laip yet.