Askim

◼ Wanem ol gutpela samting i kamap taim yumi go long kongrigesen i lukautim teritori we yumi sindaun long en?

Long rot bilong kongrigesen, yumi kisim ol tok i ‘kirapim yumi long laikim ol arapela na mekim ol gutpela pasin long ol.’ (Hi. 10:​24, 25) Long rot bilong kongrigesen yumi kisim save long tok i tru na yumi redi long inapim wok bilong yumi long kamapim ol disaipel. (Mt. 28:​19, 20) Na tu, yumi kisim strong bilong karim ol hevi, na i gat ol gutpela wasman bilong helpim yumi long winim ol bikpela hevi i laik daunim yumi na ol samting yumi tingting planti long en. Tru tumas, kongrigesen i bikpela samting bilong helpim yumi na bai yumi no dai long ol samting bilong spirit. Tasol olsem wanem? I gat ol gutpela samting inap kamap sapos yumi go long kongrigesen i lukautim teritori we yumi sindaun long en?

Sindaun bilong yumi wan wan i narapela narapela, na ol samting olsem tok ples yumi save mekim, wok mani, poroman marit i no bilip, na trenspot, ol dispela samting inap stiaim yumi taim yumi laik makim kongrigesen yumi bai go long en. Tasol ol gutpela samting inap kamap​—⁠long ol samting bilong spirit na skin⁠​—⁠​taim yumi bung wantaim kongrigesen i lukautim teritori we yumi sindaun long en. Long taim bilong hevi, ating ol elda inap painim kwik ol pablisa.

Em i gutpela moa long go long ol miting long hap i stap klostu, long wanem, yumi inap kamap paslain long miting i kirap na toktok wantaim ol narapela, mekim ol wok samting yumi mas mekim, na insait long namba wan singsing na beten. Sapos ol nupela man i laik harim tok ol i sindaun long hap yumi stap long en, em bai isi moa long go lukim ol, mekim Baibel stadi wantaim ol, na stiaim ol i go long ol miting i isi long ol i ken i go long en.

Mipela i bilip tru olsem ol het bilong famili bai beten na skelim gut dispela samting taim ol i laik makim wanem samting i gutpela bilong helpim famili bilong ol long ol samting bilong spirit na skin.​—⁠1 Ti. 5:⁠8.

This is a repeat of article in km 12/03 taken from km-E 11/02 ”Question Box”.