“Ol i Kalapim Mak Bilong Gutpela Tingting”
“OL PAIT i save kirap long tingting bilong ol man, olsem na bilong laikim pasin bilong i stap isi wantaim ol man, dispela tu i mas kirap long tingting bilong ol man.” (Sata bilong UN Educational, Scientific, and Cultural Organization) Long 1993, winim 500 saveman i tingim dispela tok taim ol i go long wanpela bung bilong Yunaitet Nesen i tok long pinisim ol samting bilong pait—ol i toktok long ol samting ol lotu i bin mekim bilong helpim ol man long i stap isi wantaim.
Siaman bilong dispela bung, em Jonathan Granoff (em mausman bilong Lawyers’ Alliance for World Security). Em i tok: “Taim ol man long nau i pait long ol man bilong narapela lotu na skin, ol i kalapim mak bilong ol stretpela pasin ol man i bin skul long en—ating ol i kalapim mak bilong gutpela tingting.” Long dispela bung ol i kamapim tok bilong John Kenneth Galbraith olsem: “Planti man i bin i dai long ol pait bilong lotu, winim ol man i bin i dai long olgeta narapela pait na bikpela bagarap olsem guria samting.”
Profesa Seshagiri Rao i tok: “Ol dokta i gat wok long stretim sik—ol i no gat wok long givim sik long ol man. Olsem tasol, ol lotu i no gat wok long kirapim ol man long birua birua na pait—ol i gat wok long helpim ol man long i stap wanbel wantaim. Tasol planti lotu i no bin mekim olsem; ol i save brukim ol lain na narapela i birua long narapela, na ol i mekim yet.”
Sampela yia i go pinis, wanpela nius (Catholic Herald bilong Landon) i tok, ol man inap i stap isi wantaim “sapos olgeta misin bilong nau inap tokaut wantaim olsem ol i no orait long pait.” Tasol nius i tok moa: “Yumi save, dispela samting i no inap kamap.” Wanpela sister Katolik i tok: ‘Sapos yumi olgeta i kirap wantaim na pasim tok long bel olsem yumi no ken insait gen long pait—olsem ol Witnes Bilong Jehova—sindaun bilong yumi bai i narapela kain tru!’
[Piksa Kredit Lain long pes 32]
Tom Haley/Sipa Press