Jehova Bai Mekim na Dispela Graun i No Ken Bagarap
LONG wanpela bilong ol ailan Moldaiv ol i mas pasim wanpela ples balus inap sampela aua long olgeta de. Bilong wanem? Long wanem, long taim bilong haiwara, solwara i save kam antap long ples balus, na ol balus i no inap pundaun. Sampela man bilong saiens i ting, insait long wan handet yia bihain, mak bilong solwara long hap bilong ol ailan Moldaiv bai go antap inap olsem wanpela mita moa. Ating sampela bai ting, wanpela mita i liklik tasol. Tasol sapos mak bilong solwara i go antap moa olsem, solwara inap karamapim 7-pela ailan olsem kantri na ol i no ken i stap moa. Wanpela nius bilong Yunaitet Nesen (UN Chronicle) i tok, sapos mak bilong solwara i go antap inap tupela mita moa, solwara inap karamapim olgeta ailan bilong dispela hap, ol inap olsem 1,200 ailan!
Wanem samting i mekim na mak bilong solwara i go antap olsem? Wanpela lain bilong Yunaitet Nesen i gat wok long skelim ol samting bilong graun ol i tok, ol ges na smok na marasin nogut i go long win na dispela i mekim na graun i wok long i go hat liklik, olsem na solwara long ol ples hat i wok long solap, na ol bikpela maunten ais i wok long kamap wara, olsem na mak bilong solwara i wok long i go antap moa. Wanpela lain long Landon (Panos Institute) i tok, dispela pasin bilong tromoi ol smok na ges nogut i go long win, “ating em i kirapim wanpela bikpela bagarap i wok long kamap isi isi long olgeta hap bilong graun na i wok long senisim mak bilong graun na solwara.”
Ol man bilong saiens i wok long skelim yet dispela tok olsem graun i wok long kamap hat. Tasol yumi ken bilip tru olsem dispela hevi i painim graun em i no inap pasim God long kamapim laik bilong em. Baibel i tok: “Bikpela i bin mekim graun i stap strong, na graun i no inap surik.” (1 Stori 16:30) Jehova i bosim olgeta samting bilong graun, na yumi ken amamas, long wanem, liklik taim nau na em bai kirap na helpim dispela graun na ol man tu na bai ol i no ken bagarap.—Song 24:1, 2; 135:6; 2 Pita 3:13.
[Piksa Kredit Lain long pes 31]
Drawing based on NASA photo