Stik i Gat Pomigranet Em Bilong Haus Bilong Jehova?

OL MAN bilong painim samting bilong bipo, ol i painim pinis planti stik bilong man i gat namba long Israel. (Stat 49:10; Esta 8:4; Esekiel 19:14) Long taun Lakis ol i bin painim sampela stik, het bilong en i olsem pikinini bilong diwai pomigranet. Lain bilong God i save gut long dispela kaikai.​—⁠Lo 8:8; Solomon 4:⁠13.

Nau tasol ol i kisim piksa bilong pikinini pomigranet i putim plaua, em ol man i wokim long tit bilong elefan (lukim piksa long han kais). Em i bikpela inap 43 milimita, na i gat hul long as bilong en, ating em bilong pasim long dispela kain stik. Lukim olpela rait Hibru (inap yia 750 B.C.E.) i stap long en.

Hap bilong en i bruk long bipo tru na hap rait i lus. Tasol ol saveman i ting olgeta rait bilong en i olsem yu lukim daunbilo. (Bilong buk Biblical Archaeologist) Sampela leta i longwe long narapela, olsem na wanpela saveman bilong Frans (André Lemaire) i ting dispela rait i tok: “Bilong Tem[pel bilong Bikp]ela [Yawe], samting holi bilong ol pris.” Na narapela saveman (Nahman Avigad) i tok: “Samting holi ol i givim bilong ol pris bilong (long) Haus bilong Yawe.”

Tupela yet na ol narapela saveman i ting, pastaim i gat 4-pela leta Hibru long en bilong nem bilong God, em Jehova. Olsem na rait i tok long “haus bilong Jehova.” Kain tok olsem i stap planti taim long Baibel.​—⁠Kisim Bek 23:19; 1 King 8:​10, 11.

Planti i ting dispela samting em i bilong wanpela pris long haus lotu Solomon i wokim, o ol man i bin givim long dispela haus lotu. Bipo i gat planti piksa bilong pikinini pomigranet long haus lotu.​—⁠Kisim Bek 28:​31-35; 1 King 7:​15- 20.

[Piksa Kredit Lain long pes 32]

Israel Museum, Jerusalem