Em i Kisim Nambawan Prais

WANPELA meri i go long haiskul, nem bilong em Kioi, i salim pas i kam long brens-ofis bilong Sosaiti Was Taua long Japan, na em i tok, “Tenkyu tru.” Em i tenkyu long wanem samting? Nau tasol wanpela resis bilong raitim stori i kamap long olgeta hap bilong Japan, na Kioi i kisim nambawan prais. Hap prais em wanpela raun i go long Swiden.

Kioi i raitim pas olsem bilong kamapim bel bilong em, em i tenkyu tru long Sosaiti Was Taua i bin wokim planti gutpela buk samting em ol i bin helpim em long kisim dispela prais. Em i insait long dispela resis, na tu, em i bin i stap olsem maus bilong skul bilong em na insait long planti narapela resis bilong raitim stori na mekim tok. Em i tok: “Planti stori mipela i mas raitim i gat as tok bilong en, na ol sumatin i save go long haus buk bilong painim save bilong wokim ol stori bilong ol. Tasol mi no mekim olsem, long wanem, planti gutpela buk i stap long haus bilong mi! Maski wanem wanem as tok ol i putim, olsem ol hevi bilong i go lapun, o pasin bilong man long bagarapim graun, o olsem wanem ol kantri inap kamap wanbel, o mekim pasin bilong yumi yet i kamap gutpela​—⁠planti taim nius Wastaua na Kirap! i stori gut long ol dispela kain samting.”

Tasol i no ol dispela buk samting tasol i bin helpim em. Nogat. Em i tok, lain Witnes Bilong Jehova i bin skulim em gut na pasin bilong em long rit na rait i kamap gutpela, na dispela i helpim em long mekim gutpela wok long ol resis bilong raitim stori. Em i tok: ‘Bipo mi laik tru long kisim bikpela save long yunivesiti, tasol ol save mi kisim long rot bilong ol Witnes i win tru.’ Nau em i gat tingting long mekim wok long ol dispela save bilong helpim ol narapela long olgeta de. Tru, Kioi i amamas long kisim prais bilong raitim stori, tasol em i gat strongpela tingting moa long kisim prais bilong laip.​—⁠Lukim Filipai 3:14.