Bai Yu Amamas Tasol

LONG kantri Filipin wanpela man na meri bilong em i bin wokabaut inap tupela de bilong kamap long en. Ol i karim tupela liklik pikinini na wokabaut long lek inap 70 kilomita long bikbus i gat planti liklik snek i save dring blut, na ol i mas brukim ol bikpela wara em bikpela ren i mekim na wara i tait. Tasol bel bilong ol i strong long ol i mas i go.

Long kantri Saier tupela meri i wokabaut inap 500 kilomita, na ol i wokabaut inap 14 de bilong kamap long en. Na wanpela lapun man long Saier, em i gat 70 krismas, em i raun i go inap 260 kilomita long wilwil bilong em. Maski rot i longwe na i hatwok, dispela i no pasim dispela lapun. Bikpela tingting bilong em i olsem: Em i mas i go.

Ol dispela manmeri i go we? Long wanpela bilong ol bikpela kibung bilong ol Witnes Bilong Jehova i kamap long kantri bilong ol. Na maski i hatwok long i go kamap long kibung, olgeta i pilim olsem hatwok bilong ol i no lus nating.

Olsem wanem? Yu tingting long i go long “Ol Man i Stap Olsem Lait” Kibung Distrik bilong 1992? Yu stretim rot pinis o i no yet? Ating yu no ken hatwok long i go long kibung, olsem ol dispela manmeri i no laik tru long lusim kibung. Tasol maski em i hatwok liklik, mipela laik kirapim yu long i go long kibung.

Ol i redim pinis ol gutpela tok em inap helpim tru yumi. Sapos yu save amamas long bung wantaim ol Kristen tru, na yu laik save long rot bilong kisim bel isi tru, na wanem samting bai kamap long bihain, na olsem wanem yu inap mekim gutpela wok moa bilong God, orait mipela i ken tok promis olsem, bai yu amamas tasol long ol tok samting i kamap long dispela kibung. Sapos yu laik save long wanem hap na long wanem taim bai dispela kibung i kamap klostu long hap yu stap long en, orait yu ken askim wanpela Witnes i stap long hap bilong yu na bai em i tokim yu.