“Ol Witnes Bilong Jehova?”
DISPELA askim long antap em wanpela het-tok long wanpela nius (Bulletin of the University of Helsinki) long tok Finlan. Aninit long dispela het-tok i gat wanpela pas, em wanpela profesa i bin raitim, na wanpela hap bilong pas i tok: ‘Mi lukim gut mak bilong yunivesiti bilong yumi em i stap long skin bilong nius Bulletin. Long namel, long hap antap, mi lukim sampela rait Hibru, na mi askim wanpela Juda long kamapim insait bilong dispela rait. Em i wanpela saveman long tok Hibru na em i tok, dispela rait em “Jehova” long tok Finlan.’
Sampela man i kirap nogut tru taim ol i kisim save olsem nem tru bilong God i stap long dispela mak bilong yunivesiti long Finlan. Tasol inap 350 yia i go pinis ol man i bin wokim na kamapim dispela yunivesiti na long dispela taim bipo planti man long olgeta hap bilong Yurop i save pinis long dispela nem Jehova, na ol i save kolim. Rait bilong dispela nem i stap long planti bikpela haus, na long sampela mani, na long sampela mak bilong ol samting, em ol i bin wokim long wankain taim olsem ol i bin wokim dispela yunivesiti.—Lukim buklet (tok Inglis) The Divine Name That Will Endure Forever.
Long taim bilong yumi, ol misin i gat nem Kristen i no save kolim nem bilong God, na i olsem ol i lusim tingting long dispela taim bipo em ol man i bin laikim dispela nem. I gat wanpela lain tasol i mekim wok long dispela nem bilong lotuim God na ol i autim long olgeta hap, olsem namba wan tok bilong Beten Jisas i lainim ol disaipel long en i tok: “Papa bilong mipela, yu stap long heven, nem bilong yu i mas i stap holi.” (Matyu 6:9) Long dispela as, taim ol man i kisim save olsem nem bilong God i stap long mak bilong dispela yunivesiti, wantu ol i tingim ol Witnes Bilong Jehova.
[Piksa Kredit Lain long pes 32]
Yliopisto