Gutpela Yumi Beten?
LONG Fraide, Me 31, 1985, strongpela win nogut tru ol i kolim tonedo, i kamap long hap bilong Onterio, long Kanada. Wanpela pasto i stap long wanpela liklik ples na win i rausim kapa long haus bilong em. Stori bilong en i kamap long nius, na pasto i tok em i bin lukim sampela mirakel na sampela bagarap i kamap long dispela taim.
Tupela man i bagarap long dispela strongpela win, na yumi save, ol famili na wantok bilong tupela ol i ting em samting nogut tru i bin kamap long dispela taim. Na planti manmeri moa, em haus bilong ol i bagarap olgeta long dispela strongpela win na ol i no gat ples slip, ol tu i ting em samting nogut tru i kamap. Tasol planti ol i bin abrusim bagarap na ol i ting dispela em i wanpela mirakel. Ron wantaim wanpela wanwok ol i bin mekim olsem. Taim ol i save pinis long samting nogut i laik kamap, i gat liklik hap minit tasol i stap, olsem 4-pela sekon bilong ol i mas ranawe i go long wanpela hap bilong ofis i gat strongpela banis bilong en. Klostu tru bagarap i painim tupela, tasol tupela i abrusim bagarap. Tupela i stori long dispela na Ron i tok: “Pastaim mi bin bilip long God, na nau mi bilip moa yet long em.”
Sampela i save tok, long taim bilong ol bikpela bagarap, ‘i no gat wanpela man i no bilip long God.’ Na long kain taim olsem, sapos i gat hap taim, ol man bai mekim planti beten na singaut long God i mas helpim ol long abrusim bagarap.
Long Sande, Julai 21, 1985, wan handet samting manmeri ol i bung bilong mekim lotu long Haus Kingdom bilong ol long hap bilong Sidni long Australia. Ol i mekim singsing bilong litimapim nem bilong God na bihain ol i beten. Nau wanpela man i mekim wanpela tok bilong Baibel na em i toktok i go inap 15 minit samting, na nau wanpela bom i pairap na dispela man i kisim bikpela bagarap, na wanpela man i sindaun long namba wan lain sia em i dai, na 40 samting manmeri ol i kisim sampela bagarap long skin na ol i go long haus sik.
[Blok/Piksa long pes 3]
Beten i Save Helpim Man?
Yumi stori pinis long tupela samting i bin kamapim bagarap−em strongpela win na samting em man nogut i bin mekim. Olsem na yumi tingting: Beten i gat strong o nogat? Em i save kamapim gutpela samting? Beten inap helpim tru yumi o olsem wanem?