Ripot long Wok Bilong Kingdom
Ol “Holimpas Stretpela Pasin” Kibung Long Kantri Filapin
LONG 1985 i gat 23 “Holimpas Stretpela Pasin” kibung long kantri Filapin. Ol dispela kibung i kamap gutpela tru. Inap olsem 213,734 manmeri i bung long ol dispela kibung; dispela lain i go bikpela inap 27 pesen, winim yia bipo. Na i winim tru lain bilong autim tok long dispela kantri. Olsem na yumi save, planti man i laik harim tok ol i bin i go long ol dispela kibung. Inap olsem 2,223 ol i bin kisim baptais. Dispela lain i go bikpela inap 14.5 pesen, winim yia bipo.
Long Tuguegaro, long Kagayan, ol i ting olsem 12,000 samting bai ol i kam long kibung. Tasol nogat. Inap olsem 24,327 ol i kam! Long redio ol i bin toktok wantaim wanpela brata inap 30 minit, na ating planti man i harim ol dispela tok long redio na dispela i kirapim ol long i kam long kibung. Man bilong redio i givim askim long brata, olsem: “Olsem wanem yupela inap bosim gut kibung na sindaunim gut ol man na ol i no mekim nabaut o pait?” Brata i tok, olgeta brata sista long kibung i wok long bihainim ol gutpela pasin Baibel i kolim, olsem pasin bilong sori na pasin wanbel. Olsem na taim mipela i gat bikpela kibung olsem i no gat kros na pait. Man bilong redio i kirap nogut na em i tok: “Oganaisesen bilong yupela i gutpela tru! Ol narapela oganaisesen i no inap mekim olsem. Taim bikpela lain olsem i bung ol i save kros na pait.”
Long dispela kibung, wanpela tisa long Yunivesiti bilong Kagayan Stet i tok: “Bikpela lain tru ol i bung, tasol ol i sindaun gut; ol i wok gut wantaim; ol i givim bel olgeta long mekim wok bilong God. Maski bikpela lain tru i kam bung, tasol i no gat pipia; ples bung i stap klinpela; olgeta i sindaun gut na i no gat kros o pait. Olsem na yumi save, ol Witnes i bihainim pasin bilong lotu olsem ol i lain pinis long en long Baibel.”
Man i lukautim bikpela stediam ol i kolim Raisal Memorial Stediam, long Manila, em i tok: “Mi lukim ol samting long kibung bilong yupela i wok gut. Nau tasol mi lukim dispela gutpela pasin bilong ol Witnes, long wanem nau em i namba wan taim mi lukim wanpela bikpela kibung bilong yupela.”
Long kibung long Kalbayog Siti, 7-pela pablisa i stap longwe long kongrigesen ol i kam long kibung na ol i kisim 14-pela manmeri moa ol i kam wantaim ol, em ol i laik harim tok. Wanpela famili long Palawan ol i laik tru long i kam kisim ol gutpela kaikai bilong spirit long kibung, olsem na ol i tromoi bikpela hap mani, olsem 20 pesen bilong olgeta mani ol i kisim long wanpela yia, bilong baim rot i go long kibung long Puerto Prinsesa Siti.
Planti brata sista bilong narapela kantri ol i go long kibung long Manila na inap 80 pesen ol i mekim sampela kain wok painia. Ol tok bilong pilai bilong kibung, nem bilong en Tingim Gut Wanem Samting Yu Laik Mekim i strongim tru ol brata. Dispela pilai i stori long wok painia. Long Iloilo Siti tripela pablisa i insait long dispela pilai, ol i pilim tru ol tok bilong en na taim ol i wok long redim pilai na kibung i no kirap yet, ol i putim aplikesen bilong kamap painia oltaim. Long Ormok Siti, siaman bilong kibung i tok, ol brata i lukim dispela pilai long kibung na bihain 6-pela pablisa i kam kisim pepa bilong mekim wok painia oltaim.
Tru tumas, nau long las taim, spirit bilong Jehova i kirapim lain bilong em long helpim wok bilong em. (Sam 110:3) Ol dispela “Holimpas Stretpela Pasin” kibung long kantri Filapin i strongim tru ol brata na ol man i laik harim tok.