Krais Jisas i Kirap Bek—Dispela i No Stori Nating
OLSEM WANEM long stori bilong Baibel long Jisas i kirap bek? Yu ting em i stori nating tasol? Wanpela nius (International Herald Tribune) i stori long wanpela Juda i save raitim ol buk em i bin skelim dispela samting. Nem bilong dispela man em Pinchas Lapide. Orait, em i kisim wanem save? Em i tok, Jisas i kirap bek tru; dispela i no stori nating.
I gat sampela samting i givim dispela tingting long em. Wanpela samting em olsem: Gutnius bilong Matyu na Mak na Luk na Jon i stori long 3-pela meri i bin i go long matmat bilong Jisas na ol i lukim matmat i stap nating. Tasol dispela nius i tok, ‘Ol man bilong bipo ol i no save bilip tumas long tok bilong ol meri; ol i ting ol meri i no inap autim tok i tru.’ Ol disaipel bilong Jisas yet ol i no bilipim tok bilong dispela tripela meri! Olsem na sapos Jisas i no bin kirap bek tru na ol i laik giamanim ol man, ol i no ken kamapim stori bilong tripela meri.
Narapela samting Lapide i tingim, em olsem: Taim Jisas i kirap bek, dispela samting i strongim tru ol disaipel bilong Em. Pastaim ol i pret, na taim ol man i kam holim Jisas ol disaipel i ranawe lusim em. Tasol taim em i kirap bek, ‘wantu ol i kisim strong na ol i no pret long autim tok, na ol i bilip tru olsem God bai kisim bek ol.’ Nius (Tribune) i stori long tingting bilong Lapide na i tok: ‘Stori nating bilong wanpela man i no inap kirapim ol long senisim pasin bilong ol olgeta na wok strong olsem.’
Na narapela samting tu, em dispela tok ol man i sutim long ol disaipel bilong Jisas, em ol i tok ol disaipel i bin stilim bodi bilong Jisas. Lapide i tok: ‘Sapos tru ol i man bilong giaman, ol i no ken strong long holimpas wanpela stori nating na kisim bikpela pen na hevi long han bilong ol man long dispela samting i go i go na bihain ol man i kilim ol i dai. Nogat.’ Tru, Lapide i no bilip olsem Jisas em i Mesaia, tasol em i bilip olsem dispela tok ensel i mekim klostu 2,000 yia bipo em i stret, em ensel i tok: ‘Krais i kirap pinis.’−Matyu 28:6.