Askim

◼ Taim ol Kristen i bung long miting o kibung na ol i laik singsing o beten, bilong wanem sampela taim wasman i tokim ol long kirap sanap?

Bipo na nau tu singsing na beten i wanpela samting bilong lotuim tru God. (1 Kronikel 16:7-9); Matyu 26:26-30; Jems 5:13, 14) Olsem na taim Ol Witnes Bilong Jehova i miting long kongrigesen o ol i kibung, ol i save singsing na beten. Planti singsing i olsem beten, o ol i litimapim nem bilong Jehova. Sapos bikpela lain manmeri ol i sanap bilong singsing na beten, i olsem ol i kamap long ai bilong God, bilong tenkyu long Em, na ol i laik mekim pasin daun long Em.—1 King 8:14, 22, 23.

Tasol sapos yumi kaunim Baibel yumi ken save, maski man i sanap o i sindaun o i stap olsem wanem, em i ken beten na singsing long God. (Lukim Luk 22:39-41; Aposel 16:24, 25.) I no gat lo long dispela samting. Sapos man i gat sik samting na em i no inap sanap taim kongrigesen i mekim singsing o beten, i no gat rong long dispela. Taim ol Kristen i beten long Buk-Stadi bilong kongrigesen o long Baibel-stadi long haus bilong ol o long taim ol i kaikai, planti taim ol i no save sanap.