“Wanpela Olpela Buk Tru” i Oraitim Em

◼ Wanpela Witnes Bilong Jehova long Brasil, long Saut Amerika, i bin mekim wok autim tok long ol haus taim em i bungim wanpela meri husat i tok wanpela olpela buk tru i bin oraitim tambu mama bilong em. Dispela Witnes i laik save, olsem na em i askim em long wanem dispela buk. Dispela meri i bekim tok olsem, “em wanpela olpela buk tru.” Na em i kamautim wanpela olpela buk i bruk bruk nabaut, em buk Baibel Stori Buk Bilong Mi, bilong pikinini bilong em.

Dispela meri i stori olsem tambu mama bilong em i bin kisim sik bilong bel hevi na em i pret long i dai na long i stap long ples tudak, olsem na em i no lusim bet bilong em. Pikinini bilong dispela meri i bin kisim buk Baibel Stori Buk Bilong Mi, na i kirap ritim long bubu meri bilong em. Bubu meri i kisim strong long samting em tumbuna pikinini bilong em i bin ritim long em, na dispela i mekim na em inap daunim bel hevi bilong em.

Dispela Witnes i tok: “Taim mi tokim dispela meri olsem ol Witnes Bilong Jehova i wokim dispela buk, na mi ken kisim wanpela nupela buk i kam long em. Em i tokim mi long kisim tupela, wanpela bilong tambu mama bilong em na narapela bilong em yet. Taim mi kam lusim buk long em, em i askim mi long kisim sampela buk moa i kam. Na i no longtaim, em i kisim 16 buk bilong givim long ol poroman bilong em!”

Yu ken kisim buk Baibel Stori Buk Bilong Mi, em i gat 116 stori bilong ol man na bilong ol samting i bin kamap em Baibel i stori long en. Insait long 30 yia i go pinis taim ol i bin kirap wokim dispela buk, ol i bin prinim inap olsem 72 milion. Bilong kisim dispela buk, yu ken raitim nem bilong yu long hap hia na salim long atres i stap long dispela hap o i stap long pes 5 bilong dispela nius.

□ Salim wanpela buk Baibel Stori Buk Bilong Mi long mi.

□ Makim wanem tok ples.

□ Plis kam lukim mi, mi laik stadi long Baibel, no gat pe.