“Bikpela Laik Bilong Mi”
LONG Waranya, Yugoslavia, tisa i tokim ol sumatin long raitim wanpela stori long wanem samting i olsem bikpela laik bilong ol. Ol tok i stap daunbilo em stori bilong Sergej, em i gat 8-pela krismas. Bihain ol i putim dispela stori bilong em long notisbot long skul bambai olgeta i ken ritim.
“Pastaim mi gat laik long raitim stori bilong mi olsem, bikpela laik bilong mi em long pinisim haiskul na kisim ol gutpela mak na i go holide long Belgret. Tasol long haus mi wok long tingim narapela samting. Bikpela laik bilong mi em mi laik bai ol manmeri long olgeta hap bilong graun ol i ken stap bel isi, na long olgeta manmeri i stap amamas, na ol i laikim ol narapela na helpim ol. Mi laik bai olgeta manmeri i ken i stap gutpela na ol i no ken sik, na mi laik bai graun bilong yumi i mas kamap klin moa, winim bilong nau.
“Long nau kain kain marasin nogut i bagarapim graun. Wara na win tu i bagarap. Planti manmeri ol i stap hangre, olsem na planti tausen pikinini i save dai long olgeta de, na planti moa ol i dai, long wanem, ol i kisim sik. Mi laik bai olgeta dispela samting i pinis olgeta, na mi laik bai olgeta pikinini i pilim olsem papamama i laikim ol, olsem na taim ol i laik slip ol i amamas, long wanem, ol i save long olgeta moningtaim ol i kirap bai ol i stap amamas. Long nau dispela samting i no inap kamap, tasol em bai kamap long bihain. Dispela em bikpela laik bilong mi.”
Wanem samting i mekim na Sergej i bilip tru olsem ol dispela samting bai kamap? Em i save bilip long ol tok promis bilong God olsem Baibel i stori long en. Namba 10 Hap bilong liklik buk Tru God i Save Tingim Yumi? em i stori long ol dispela promis aninit long liklik het-tok “Gutpela Nupela Taim God Bai Kamapim.” Yu ken kisim dispela liklik buk, sapos yu raitim nem na atres long hap daunbilo na salim i kam long atres i stap long en o long atres i stret long yu em i stap long pes 5 bilong dispela nius.
□ Salim wanpela liklik buk Tru God i Save Tingim Yumi? i kam long mi.
□ Plis, toksave long mi long pasin bilong kisim Baibel-stadi i no gat pe.