God i Stap o Nogat?—Tok Bilong Sampela Saientis
WANPELA profesa bilong saiens long wanpela yunivesiti (Massachusetts Institute of Technology), em Ulrich J. Becker, em i stori long God i stap, na em i tok: ‘Olsem wanem mi inap i stap sapos i no gat Man i bin wokim mi? Mi no save long wanpela gutpela bekim bilong dispela askim.’
Yu ting dispela tok i pait wantaim tingting bilong em long ol samting bilong saiens? Dispela profesa i kamapim gutpela bekim yumi ken tingim, olsem: ‘Sapos yu kisim save olsem wanpela wil insait long “klok” i wok olsem wanem, ating bai yu inap tingting long ol narapela wil insait long klok i wok olsem wanem, tasol i tambu long kolim dispela tingting bilong yu olsem samting bilong saiens, na mobeta yu no wok long kisim save olsem husat i taitim spring na klok i wok.’
Maski sampela man i ting ol saientis i no save bilip long wanpela Bikpela Saveman i bin wokim ples antap na graun na man, planti man bilong saiens i gat nem, ol i bilip olsem.
Tingim tok bilong tupela man long dispela samting. Taim ol i askim Profesa John E. Fornaess, em wanpela profesa bilong ol namba long Yunivesiti Prinston, long tingting bilong em long God, olsem God i stap o nogat, em i tok: ‘Mi bilip olsem God i stap na God i helpim ol samting bilong antap na long graun long wok gut, maski em ol liklik liklik samting tru yumi no inap lukim long ai, o em ol samting i gat laip, o ol traipela lain sta.’
Wanpela profesa bilong saiens long Yunivesiti Yel, em Henry Margenau, em i tok em i bilip strong olsem God i as bilong ol lo i bosim graun, na em i tok moa: ‘I no gat wanpela samting i stap na God i kirap wokim ol samting long antap na long graun, na dispela i mekim na ol de, na mun, na yia samting i kamap.’ Na em i tok, long wanpela buk (The Mystery of Life’s Origin) tripela saientis i tok, i stret yumi ken ting i gat wanpela Man bilong wokim olgeta samting i gat laip. Wanpela saveman bilong ol sta samting (Fred Hoyle), em tu i gat dispela tingting. Em i tok, sapos yumi bilip olsem namba wan liklik samting i gat laip, olsem sel, em i kamap nating, orait i olsem yumi bilip wanpela bikpela raunwin i bin go insait long wanpela banis i gat ol hap hap bilong balus 747 i stap nabaut nabaut long en na raunwin i bungim ol dispela hap hap na kamapim wanpela balus 747.
Yumi ken tingim tu ol tok bilong wanpela man bilong raitim Baibel, em Pol, em i tok: “Stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait. Ol inap save long as bilong pasin bilong God, na ol inap save long bikpela strong bilong en i stap oltaim oltaim.”—Rom 1:20.
Tru tumas, God i stap tru! Tasol i gat wanem as na em i larim ol samting nogut i kamap long graun long nau? Em i gat wanem laik long dispela graun? Yumi inap save long husat em i God tru?
[Rait long pes 3]
‘Sapos yu kisim save olsem wanpela wil insait long “klok” i wok olsem wanem, ating bai yu inap tingting long ol narapela wil insait long klok i wok olsem wanem, tasol . . . mobeta yu no wok long kisim save olsem husat i taitim spring na klok i wok’