Bilong Wanem Em i No Bilip Long God?
OLESYA, em wanpela yangpela meri long Rustavi, Jojia, em bipo Soviet Yunion i bosim. Em i soim piksa bilong papamama bilong em long tupela man i kam long haus na em i tok: “Sapos God i stap tru, em i no inap larim papamama bilong mi i dai taim ol i yangpela yet!” Taim man bilong Olesya, em Tamazi, em i kam long haus, tupela man i lusim buklet Stap Amamas Oltaim Long Graun! na “Harim! Mi Mekim Olgeta Samting i Kamap Nupela!” long tupela.
Taim ol i mekim gobek long tupela marit, Olesya i kaunim pinis buklet “Harim!” na em i laik stadi long Baibel. Em i amamas long samting em i kaunim. Long taim ol i stori, kwiktaim em i opim buklet na kaunim ol hap em i bin makim. Ol dispela gutpela tok i kirapim tru bel bilong em.
Olsem buklet i tok: “Ol gutpela gutpela samting bilong dispela graun—ol plaua, na pisin, na animal, na yumi ol man, na laip, na pasin bilong pikinini i kamap insait long bel bilong mama—olgeta dispela samting i kamapim long ples klia bikpela tingting na save i as bilong olgeta dispela samting. (Rom 1:20) Tasol tingting i no inap i stap bilong en yet tasol; tingting i kamap long kru na kru i stap long bodi, olsem na yumi save i gat wanpela Man i stap em i gat dispela bikpela tingting na save. Yumi no inap lukim em, tasol em i Nambawan Bikpela Man; em i Man bilong wokim olgeta samting i gat laip; em i As tru bilong laip. (Song 36:9) I stret yumi olgeta i mas litimapim nem bilong Em na laikim tumas Em.—Song 104:24; KTH 4:11.”
Bihain Olesya i kamapim tingting bilong em olsem, tok promis bilong God long kirapim bek ol manmeri yumi laikim tumas ol, dispela i bin kirapim laik bilong em long stadi long Baibel. Mipela bilip olsem, yu tu bai kisim gutpela samting long ol tok bilong dispela buklet bilong strongim bilip bilong yu. Sapos yu laik kisim wanpela bilong buklet Stap Amamas Oltaim Long Graun! na “Harim! Mi Mekim Olgeta Samting i Kamap Nupela!,” o yu laik bai wanpela i kam long haus bilong yu na stadi long Baibel wantaim yu, nogat pe, orait raitim pas long IBSA, Box 636, Boroko, NCD 111, Papua New Guinea, o lukim atres long pes 5 em i stret long yu.