Yu Stap Olsem Wanpela Pisin i Stap Wanpis?

GRAS bilong en i no lait na i no gat ol naispela kala, olsem na em i no inap winim prais olsem naispela pisin tru. Long Florida mi bin lukim dispela pisin, gras bilong en i braunpela, na taim em i laik kisim pis em i save sut i go daun insait long wara. Long hap bilong Sili gras bilong pisin i waitpela, pul na bodi tasol i blakpela. (Lukim piksa.) Mi bin lukim ol i sanap na malolo long sampela bikpela ston long Valparaiso, long Pasifik. Ol i sanap olsem man i bel hevi na het i go daun. Tasol ating as bilong dispela i olsem ol i kaikai pinis na ol i wet inap long kaikai i sindaun gut long bel.

Hevi bilong sampela pisin i olsem 14 kilo, na bikpela bilong ol i olsem 1.5 mita. Em i gat longpela pul​—3-pela mita samting. Bikpela bilong en i winim planti narapela pisin. Pasin bilong en long wokabaut i pani na i olsem skin bilong en i hevi, tasol taim em i kirap na flai em i naispela tru, na em i flai isi isi olsem em i no hatwok long mekim. Taim em i kisim pis, bikpela hap wara olsem 10-pela lita i stap long maus bilong en. Em wanem kain pisin? Em pisin pelikan.

Long planti kantri, ol pelikan i save raun long ol raunwara na wara na nambis. Maus bilong en i longpela tru na em i gat bikpela paus long maus. Tasol maus i gutpela, long wanem, pasin bilong pelikan long kisim pis i narapela kain. Em i save sut i go insait long wara na pulapim wara na pis long maus bilong en. Wantu em i rausim wara long maus na daunim pis.

Baibel i stori 5-pela taim long pelikan. Dispela kain pisin i amamas long stap wanpis long ol ples nating, olsem na long Baibel dispela pasin bilong pelikan i makim ples i bagarap, no gat man i stap long en. (Aisaia 34:11; Sefanaia 2:​13, 14) Buk Insight on the Scriptures i tok: ‘Taim pelikan i kaikai pinis, planti taim em i flai i go na stap long wanpela ples nating. Na em i sanap olsem man i bel hevi na het i go daun. Pisin i stap olsem inap planti aua, na dispela pasin bilong pelikan i wankain long tok bilong man i bel hevi na raitim Song, olsem: “Mi olsem pelikan bilong ples nating.” (Song 102:​6, NW)’ Olsem na sapos yu pilim olsem yu stap wanpis na yu bel hevi, ating bai yu tu i stap wankain olsem pelikan!​—Em stori bilong wanpela man.

[Ol Piksa long pes 15]

Ol pelikan long Sili.

Liklik blok: Braunpela pelikan long Florida