Tok Bilong Kot i Helpim Ol Sikman
“MAN o meri i bos bilong skin bilong em yet, na dispela i olsem lo ol man i bin tingim long bipo yet na i kam inap long nau, na olgeta man i save long dispela.” Jas Sydney Robins i bin tok olsem, em i jas bilong Kot Bilong Apil long Ontario long Kanada. Wanem samting i bin kamap na jas i tok olsem?
Long 1979 Mista na Misis Malette bilong Kwibek long Kanada i kisim bagarap long ka na man i dai pinis, na ol i kisim meri i go long haus sik, em tingting bilong em i dai. Long haus sik ol i lukim wanpela kat i stap long em bilong tambuim ol long givim blut long em, long wanem, em i bilip olsem dispela i brukim lo bilong God. (Na sapos man i kisim blut, sampela taim dispela inap givim bikpela sik long em.) Tasol dokta i sakim tok bilong kat na em i givim blut long Misis Malette, olsem na Misis Malette i putim dokta na haus sik long kot, long wanem, ol i mekim nogut long skin bilong em na long bilip bilong em long ol samting bilong lotu. Kot i tok, ol i bin rongim em na ol i mas baim em long $20,000. Ol i apil na bai bikpela Haus Kot bilong Ontario i ken harim gen kot bilong ol.
Kot Bilong Apil i helpim tok bilong Misis Malette na i tok:
‘Sikman i bos bilong skin bilong em, na sapos em i laik sakim sampela samting dokta i laik mekim long em, i stret em i ken sakim. Tru, bilong i stap laip em i bikpela samting, tasol sampela i bilip olsem i gat sampela samting i bikpela moa na i antap long laip bilong ol, olsem: Long taim bilong pait, o bilong helpim poroman marit o pikinini na bai em i no ken bagarap, gutpela tingting i kirapim man long putim ol dispela samting i go antap long laip bilong em. Sapos dokta i laik mekim wanpela samting long man bilong oraitim sik bilong em, tasol man i no laik, long wanem, em i ting dispela i brukim lo bilong God, gutpela tingting i kirapim em long mekim olsem.’
Na Kot Bilong Apil i tok: ‘Maski dokta i tok wanem, em laik bilong sikman yet long makim wanem samting dokta i laik mekim long em. Sapos dokta i sakim laik bilong sikman na dokta i mekim narapela samting long sikman, dokta i brukim lo. Sapos sikman i salim toksave long dokta pastaim [olsem long rot bilong kat ol Witnes Bilong Jehova i save karim] na dokta i sakim, i olsem em i sakim maus bilong sikman. Sapos Witnes Bilong Jehova i tok, no ken givim blut long em, tasol ol i sakim tok bilong em na ol i givim blut long em, orait ol i kalapim laik bilong em long bosim skin bilong em, na ol i mekim nogut long bilip bilong em na long ol lo em i laik bihainim.’
Dokta i bin tok, dispela kat i no gat strong, tasol jas i tok, ‘Mi no wanbel long dispela tok olsem dispela kat bilong ol Witnes Bilong Jehova i olsem hap pepa nating. Ol tok i stap long dispela kat i tambuim ol long givim blut long Misis Malette. Laik bilong em i stap ples klia na ol inap lukim, maski em yet i no inap toktok.’
Laspela tok bilong jas, em i tok, ‘sapos ol Witnes i sakim blut, orait, wanem wanem samting i painim ol long dispela, em samting bilong ol. Bihain ol yet o famili bilong ol i no ken tok dispela kat i no kolim klia laik tru bilong ol.’