Tuku tlakg xlakaskinka laksaka chatum lataman wa pi natamakamastani Jehová chu namakgtapakgsi kxfamilia. Xla lakaskin pi putum latamanin kalaksakkgolh chuna natlawakgo. Lakaskin pi tlan katalalinkgolh chu kalatamakgolh putum kilhtamaku (Deut. 30:​19, 20; Gál. 6:​7, 8). Jehová niti mafuerzajlini naskujnani, wata masta talakaskin pi chatunu nalaksaka tuku natlawa. Pero ¿tuku la akxni chatum kstalanina Cristo tlawa akgtum lanka talakgalhin? Komo ni makgxtakga xtalakgalhin, tamakxtukan kcongregación (1 Cor. 5:13). Pero maski chuna, Jehová lakaskin pi uma lataman kalakgtaspitli. Pulaktum tuku xlakata mastalh talakgmaxtut wa pi tlan xkatapatilh tiku makgxtakgkgo xtalakgalhinkan. KiDioskan lu xapaxkina, chu wa xlakata kawani tiku tlawakgonit talakgalhin pi kamakgxtakgkgolh xtalakgalhinkan (Zac. 1:3; Rom. 2:4; Sant. 4:8). w24.08 14:​1, 2

Akxni apóstol Juan tsokgli xlimaktutu xcarta, xwilakgo tiku xmasiyamakgo tuku ni xaxlikana chu xkamapapitsimakgo natalan. Pero na xwilakgo tiku “xlilamakgo xaxlikana”, xkgalhakgaxmatkgo Jehová chu “chuntiya xkgalhakgaxmatmakgo xlimapakgsin” (2 Juan 4, 6). Xlakan lu xmakgapaxuwakgo Jehová, chu nachuna Juan (Prov. 27:11). Uma kinkamasiyaniyan pi napaxuwayaw komo ni namakgxtakgaw Jehová (1 Juan 5:3). Kalilakpuwaw, paxuwayaw xlakata katsiyaw pi makgapaxuwamaw Jehová. Chu xla chu ángeles paxuwakgo akxni kgalhakgaxmataw xlimapakgsin Jehová chu lakgmakganaw tuku kinkamatlawiputunan kakilhtamaku (Luc. 15:10). Akinin na paxuwayaw akxni kinatalankan ni makgxtakgkgo Jehová (2 Tes. 1:4). Chu akxni xkakilhtamaku Akgskgawini namalakgsputukan, napaxuwayaw xlakata katsiyaw pi ni makgxtakgnitaw Jehová. w24.11 12, 13:​17, 18

Komo wi tiku lakgatiya, ¿la xlilhuwa kilhtamaku natitaxtu xlakata tlan nawaniya? Komo tunkun nawaniya, max nalakpuwan pi ni pulana lilakpuwana tuku tlawaya (Prov. 29:20). Pero komo tala naʼakxilha pi lakgatiya pero titaxtu lhuwa kilhtamaku chu wix nitu waniya, max nalakpuwan pi ni liwana katsiya tuku lakaskina (Ecl. 11:4). Kalakapastakti pi ni talakaskin liwana nakatsiya pi wa natatamakgaxtokga xlakata tlan nawaniya pi tlakg lakgapasputuna. Pero liwana milikatsit komo tlantiya natamakgaxtokga chu pi tala tiku tlakg lakgapasputuna wa tiku max tlan xtatamakgaxtokgti. ¿Chu tuku militlawat komo naʼakxilha pi wi tiku tlakg lakgapasputunan? Komo wix nichuna lakpuwaniya, kalimasiyani pi wix ni lakgatiya. Ni xlilat namalakpuwaniya pi na lakgapasputuna komo nichuna makgkatsiya (Efes. 4:25). w24.05 22, 23:​9, 10