Ncinzi ncotwiiya kumajwi aamwaapostolo Paulo ngaakalembela bana Tesalonika? Ciindi notwamvwa makani amwi aateendelani anzyotwakaiya mu Bbaibbele naa notwamvwa makani aatyompya, tweelede kubelesya busongo. Mu Soviet Union yakaindi, babelesi bamfwulumende bakapa bakwesu lugwalo ilwakali kulibonya mbuli kuti luzwa kumaofesi mapati. Lugwalo oolo lwakali kukulwaizya bakwesu bamwi kupanga mbunga iimbi. Lwakali kulibonya mbuli kuti lwakali kuzwa kumaofesi mapati ncobeni. Pele bakwesu basyomeka kunyina nobakeenwa. Bakabona kuti mulumbe wakali mulugwalo oolo tiiwakali kweendelana anzyobakaiya. Mazuba aano, basinkondoma babelesya zintu mbuli Intaneti alimwi amawebbusaiti aakubandikila kusola kutunyonganya alimwi akutwaandaanya. Muciindi cakufwambaana kulekela mizeezo yesu, tulakonzya kulikwabilila kwiinda mukubikkila maano kubona naa zintu nzyotumvwa naa kubala zileendelana akasimpe nkotwakaiya.—2Tes. 2:2; 1Joh. 4:1. w24.07 12 ¶14-15

Cakusala ciyandika kapati muntu ncakonzya kupanga, nkusala kulyaaba kuli Jehova alimwi akuba cibeela camukwasyi wabakombi bakwe. Jehova uyanda kuti bantu boonse bacite oobo. Nkaambo nzi? Uyanda kuti kabali balongwe bakwe akuyoopona mane kukabe kutamani. (Dt. 30:​19, 20; Gal. 6:​7, 8) Nokuba boobo, Jehova kunyina nasinikizya muntu uuli woonse kuti amubelekele. Ulamulekela muntu uuli woonse kuti alisalile ncayanda kuyoocita. Pele ino mbuti kuti Munakristo uubbapatizyidwe watyola mulawo wa Leza kwiinda mukucita cibi cipati? Ikuti naa tanaayempwa, weelede kugusyigwa mumbungano. (1Kor. 5:13) Nokuba boobo, Jehova uyanda kuti muntu ooyo ayempwe akupiluka kulinguwe. Amana buya, aaka nkakaambo kapati ncaakatupeda cinunuzyo, kutegwa cikonzyeke kuli basizibi ibeempwa kulekelelwa zibi zyabo. Aboobo Leza wesu siluyando, ukulwaizya baabo bacita zibi zipati kuti beempwe.—Zek. 1:3; Rom. 2:4; Jak. 4:8. w24.08 14 ¶1-2

Ciindi mwaapostolo Johane naakalemba lugwalo lwakwe lwatatu, bantu bamwi bakali kuyiisya njiisyo zyakubeja, calo cakaleta kwaandaana mumbungano. Nokuba boobo, bamwi bakazumanana ‘kweenda mukasimpe.’ Bakazumanana kumumvwida Jehova alimwi bakali “kweenda kweelana amilawo yakwe.” (2Joh. 4, 6) Banakristo aabo basyomeka, bakapa kuti Johane a Jehova bakkomane kapati. (Tus. 27:11) Ncinzi ncotwiiya? Twiiya kuti kusyomeka kuletela lukkomano. (1Joh. 5:3) Mucikozyanyo, tulakkomana akaambo kakuzyiba kuti tukkomanisya Jehova. Awalo Jehova ulakkomana ciindi natubona katutantamuka kucita zintu zibyaabi akumvwida milawo yakwe. Kunze lyaboobo, abalo bangelo kujulu balakkomana kapati. (Lk. 15:10) Andiswe tulakkomana kapati ciindi notubona bakwesu abacizyi kabazumanana kusyomeka. (2Tes. 1:4) Aboobo ciindi nyika ya Saatani yaakunyonyoonwa, tuyookkomana kapati akaambo kakuti twakazumanana kusyomeka kuli Jehova. w24.11 12 ¶17-18