ምስቶም ንየሆዋ ዜፍቅርዎ ግዜ ኣሕልፍ

ምስቶም ንየሆዋ ዜፍቅርዎ ግዜ ኸነሕልፍ ዘሎና ስለምንታይ ኢና፧ ምኽንያቱ ኣዕሩኽና ጽቡቕ ወይ ሕማቕ ጽልዋ ኼሕድሩልና ይኽእሉ እዮም። (ምሳ 13:20) ንኣብነት፡ ንጉስ ዮኣስ ምስ ካህን የሆያዳ ግዜ የሕልፍ ኣብ ዝነበረሉ እዋን፡ “ኣብ ቅድሚ ኣዒንቲ የሆዋ ቕኑዕ ይገብር ነበረ።” (2ዜና 24:2) ድሕሪ ሞት የሆያዳ ግና ዮኣስ ብሰንኪ ሕማቕ ዕርክነት ንየሆዋ ሓደጎ።—2ዜና 24:17-19።

ኣብ ቀዳማይ ዘመን፡ ሃዋርያ ጳውሎስ ንክርስትያናዊት ጉባኤ ምስ “ዓብዪ ቤት፡” ንኣባላት ጉባኤ ድማ ምስ “ኣቕሑ” ኣመሳሲልዎም ኣሎ። ንየሆዋ ዜጕሂ ነገራት ካብ ዚገብር ዝዀነ ይኹን ሰብ፡ ዋላ እውን ኣባል ስድራ ቤትና ዀነ ኣባል ጉባኤ፡ ካብኡ እንተ ርሒቕና “ንኽብሪ ዚኸውን ኣቕሓ” ዄንና ኽንቅጽል ንኽእል ኢና። (2ጢሞ 2:20, 21) ስለዚ፡ ምስቶም ንየሆዋ ዜፍቅርዎን ንዕኡ ኸነገልግሎ ዜተባብዑናን ሰባት ንተዓራረኽ።

ነታ ካብ ሕማቕ ዕርክነት ርሓቕ ዘርእስታ ቪድዮ ርኣያ እሞ፡ ድሕሪኡ ነዚ ዚስዕብ ሕቶታት መልሶ፦

• ከይተፈለጠና ምስቶም ሕማቕ ጽልዋ ኼሕድሩልና ዚኽእሉ ሰባት፡ ግዜ ኸነሕልፍ እንኽእል ብኸመይ ኢና፧

• ኣብቲ ድራማዊ ቪድዮ፡ ሰለስተ ክርስትያናት ካብ ሕማቕ ዕርክነት ኪርሕቑ ዝሓገዞም እንታይ እዩ፧

• ኣዕሩኽካ ብጥበብ ክትመርጽ ኪሕግዘካ ዚኽእል ኣየናይ ስርዓታት መጽሓፍ ቅዱስ እዩ፧