ኣብ የሆዋ እንእመነሉ ሰለስተ መገዲ

ዳዊት ኣብ የሆዋ ስለ እተኣመነ ንጐልያድ ስዒርዎ እዩ። (1ሳሙ 17:45) የሆዋ ንዅሎም ኣገልገልቱ ብርታዐኡ ኼርእዮም ይደሊ እዩ። (2ዜና 16:9) ኣብ ናይ ገዛእ ርእስና ተመክሮን ክእለትን ዘይኰነስ፡ ኣብቲ የሆዋ ንዓና ንምሕጋዝ ዝገበሮ መሰናድዎ ኽንእመን እንኽእል ብኸመይ ኢና፧ ነዚ ዚስዕብ ሰለስተ መገዲ ንርአ፦

• ኣዘውቲርካ ጸሊ። ጌጋ ምስ ፈጸምካ ኺሕደገልካ ጥራይ ዘይኰነስ፡ ፈተናታት ኬጋጥመካ ኸሎ እውን ብርታዐ ንምርካብ ጸሊ። (ማቴ 6:12, 13) የሆዋ ነቲ ኣቐዲምካ ዝወሰንካዮ ውሳነ ኺባርኸልካ ጥራይ ዘይኰነስ፡ ውሳነ ቕድሚ ምግባርካ እውን ጥበብን መምርሕን ምእንቲ ኺህበካ ጸሊ።—ያእ 1:5

• መጽሓፍ ቅዱስ ናይ ምንባብን ናይ ምጽናዕን ልማድ ይሃሉኻ። መዓልቲ መዓልቲ መጽሓፍ ቅዱስ ኣንብብ። (መዝ 1:2) ብዛዕባ እቶም ኣብ መጽሓፍ ቅዱስ ዚርከቡ ኣብነታት ኣስተንትን፣ ነቲ ዝረኸብካዮ ትምህርቲ ድማ ተግብሮ። (ያእ 1:23-25) ኣብ ኣገልግሎት ኣብ ናይ ገዛእ ርእስኻ ተመክሮ ኣብ ክንዲ እትውከል ኣጸቢቕካ ተዳሎ። ካብ ኣኼባታት ጉባኤ ምሉእ ብምሉእ ምእንቲ ኽትጥቀም ኣቐዲምካ ተዳሎ

• ምስ ውድብ የሆዋ ተሓባበር። ነቲ ኻብ ውድብ የሆዋ ዚመጽእ እዋናዊ መምርሒ ኣስተብህለሉ ብኡብኡ ድማ ስዓቦ። (ዘሁ 9:17) ሽማግለታት ምኽርን መምርሕን ኪህቡ ኸለዉ ስምዓዮም።—እብ 13:17

ነታ መስጐጕቲ እንፈርሃሉ ምኽንያት የብልናን ዘርእስታ ቪድዮ ርኣያ እሞ፡ ድሕሪኡ፡ ነዚ ዚስዕብ ሕቶታት መልሶ፦

• ነቶም ኣሕዋትን ኣሓትን እንታይ ዜፍርህ ነገራት እዩ ኣጋጢምዎም፧

• ንፍርሆም ኪዋጽእሉ ዝሓገዞም እንታይ እዩ፧