እምነት ዜደልድል ራእይ

9:1-7

የሱስ ኣብ እዋን እቲ ተኣምራዊ ምልዋጥ እቲ ሰማያዊ ኣቦኡ ኸም ዚሰምሮ ኺገልጸሉ ኸሎ እንታይ ከም እተሰምዖ እሞ ሕስብ ኣብሎ። እዚ ንየሱስ ነቲ ስዒቡ ዜጋጥሞ መከራ ኺጻወሮ ኸም ዝሓገዞ ዜጠራጥር ኣይኰነን። ብዘይካዚ፡ እዚ ራእይ እዚ፡ ንጴጥሮስን ያእቆብን ዮሃንስን ሓያል ጦብላሕታ ኣሕዲሩሎም እዩ። የሱስ ብሓቂ እቲ መሲሕ እዩ ነይሩ፣ ንዕኡ ምስማዖም ድማ ቅኑዕ እዩ ነይሩ። ጴጥሮስ ኣስታት 32 ዓመት ጸኒሑ፡ እቲ ፍጻመ ዘሕደረሉ ጦብላሕታን ኣብቲ “ትንቢታዊ ቓል” ንዘለዎ እምነት ብኸመይ ከም ዘደልደለሉን ዘኪሩ እዩ።—2ጴጥ 1:16-19።

ዋላ እኳ ነዚ መሳጢ ራእይ እዚ ብብሕትና እንተ ዘይረኣናዮ፡ ፍጻመኡ ግና ክንምስክር ንኽእል ኢና። ከመይሲ፡ ሕጂ የሱስ ሓያል ንጉስ ኰይኑ ይገዝእ ኣሎ። ድሕሪ ሓጺር ግዜ፡ ነታ ጽድቂ ዝሰፈና ሓዳስ ዓለም መገዲ ብምጽራግ “ዓወቱ ኺፍጽም” እዩ።—ራእ 6:2፡ እ.ጽ.።

ትንቢታት መጽሓፍ ቅዱስ ኪፍጸም ከሎ ብምርኣይካ እምነትካ ዝደልደለት ብኸመይ እያ፧