ነታ ቐዳመይቲ ፍቕርኻ ኣይትሕደጋ

¹ እቲ ኽብሪ ዝዓሰሎ የሱስ: ነታ ኣብ ቀዳማይ ዘመን ዝነበረት ጉባኤ ኤፌሶን: “ነታ ቐዳመይቲ ፍቕርኻ ሐዲግካያ ኢኻ እሞ እዚ ረኺበልካ አሎኹ” በላ። (ራእ. 2:4) ብዙሓት ካብኣቶም ነታ ንየሆዋ ዝነበረቶም ቀዳመይቲ ፍቕሪ ሓዲጎምዋ ነይሮም ኪዀኑ ኣለዎም። ሓቂ ኽንመሃር ከለና: ንየሆዋን ንብጾትናን ሓያል ፍቕሪ ኣማዕቢልና ኢና፣ እዚኣ ድማ ነታ ሓዳስ ዝረኸብናያ ተስፋ ንኻልኦት ብቕንኣት ከነካፍሎም ኣለዓዒላትና እያ። ነታ ቐዳመይቲ ፍቕርና ኸይንሓድግን ኣብ ኣገልግሎት ከይንዝሕትልን እንታይ ኪሕግዘና ይኽእል፧

² ብሕታዊ መጽናዕትን ኣኼባታት ምክፋልን:- መጀመርታ ሓቂ ኽንመሃር ከለና: ንኣምላኽን ንብጾትናን ከም እነፍቅር ዝገበረና እንታይ እዩ፧ እቲ መጽናዕቲ ቅዱሳት ጽሑፋት ብምግባር ብዛዕባ የሆዋ እተማሃርናዮዶ ኸይኰነ፧ (1 ዮሃ. 4:16, 19) ስለዚ: ፍቕርና “እናበዝሔ ኪኸይድ”: “መዓሙቝ ኣምላኽ” ብምዅዓት ርጡብ ፍልጠት ቃል ኣምላኽ ምውሳድ ክንቅጽል ኣሎና።—ፊል. 1:9-11፣ 1 ቈረ. 2:10

³ ኣብዘን ጭንቀትን ኣቓልቦኻ ዚሰርቕ ነገራትን ዝመልአን ዳሕሮት መዓልትታት: ጽቡቕ ልማድ ብሕታዊ መጽናዕቲ ኺህልወካ ኣጸጋሚ እዩ። (2 ጢሞ. 3:1) መንፈሳዊ ምግቢ እንምገበሉ ግዜ ኽንምድብ ኣሎና። ብፍላይ ‘እታ መዓልቲ እቲኣ ትቐርብ ከም ዘላ ኽንርኢ ኸለና’ ኣብ ኣኼባታት ጉባኤ ኣዘውቲርካ ምክፋል እውን ኣዝዩ ኣገዳሲ እዩ ዚኸውን።—እብ. 10:24, 25

⁴ ኣገልግሎት:- ኣብ ኣገልግሎት ብቕንኣት ምክፋል ነታ ቐዳመይቲ ፍቕርና ኸይንሓድግ ይሕግዘና። ነቲ ብስራት ክንሰብኽ ከለና: ንርእስና ብዛዕባ እቲ ፍቕራዊ መብጽዓታት የሆዋ ነዘኻኽራ፣ እዚ ኸኣ ተስፋና ብሩህ: ፍቕርና ድማ ህያው ክትከውን ይሕግዘና። ሓቅታት መጽሓፍ ቅዱስ ንኻልኦት ክንምህር እንተ ዄንና: ቅድም ንሕና ነቲ ትምህርቲ ምሉእ ብምሉእ ንኽንርድኦ ምርምር ክንገብር ኣሎና: እዚ ድማ እምነትና የደልድለልና።—1 ጢሞ. 4:15, 16

⁵ የሆዋ: ፍቕርና እውን ሓዊስካ ዅሉ ዚግብኦ እዩ። (ራእ. 4:11) ስለዚ: ፍቕርኻ ኽትሃስስ ኣይተፍቅደላ። ትጉህ ኴንካ ብሕታዊ መጽናዕቲ መጽሓፍ ቅዱስ ብምግባር: ኣኼባታት ኣዘውቲርካ ብምክፋል: ከምኡውን ነቲ እትፈትዎ ብስራት ብቕንኣት ብምእዋጅ ነታ ቐዳመይቲ ፍቕርኻ ኣደልድላ።—ሮሜ 10:10