ትሕትና ልበሱ
1 ሓደ ጓሳ ኣብ የሆዋ ብምእማን ንሓደ ሓያል ተዋጋኢ ኣሰነፎ። (1 ሳሙ. 17:45-47) ሓደ ሃብታም ሰብኣይ ንዝወረዶ መዓት ብትዕግስቲ ጾሮ። (እዮ. 1:20-22፣ 2:9, 10) ወዲ ኣምላኽ ከኣ ኵሉ ትምህርቱ ኻብ ኣቦኡ ምዃኑ ኣፍልጦ ሃበ። (ዮሃ. 7:15-18፣ 8:28) ኣብዚ ሰለስቲኡ መዳያት: ትሕትና ኣገዳሲ ግደ እዩ ነይርዋ። ኣብዚ ግዜና እውን ብተመሳሳሊ ኣብቲ ዘጋጥመና ዅነታት ትሕትና ኣገዳሲ ግደ ኣለዋ።—ቈሎ. 3:12
2 ክንሰብኽ ከለና:- ከም ክርስትያናት ኣገልገልቲ መጠን ዓሌት: ባህሊ: ወይ መበቈል ከይፈለና ንዅሎም ሰባት ኢና ነቲ ብስራት እንነግሮም። (1 ቈረ. 9:22, 23) ገሊኣቶም ሕማቕ መልሲ እንተ መሊሶምልና ወይ ብትዕቢት ንመልእኽቲ መንግስቲ ኣምላኽ እንተ ነጺጎምዎ: ተመሳሳሊ ምላሽ ኣይኰንናን እንህቦም፣ የግዳስ ብትዕግስቲ ኢና ነቶም ብቑዓት እነናዲ። (ማቴ. 10:11, 14) ብፍልጠትና ወይ ብትምህርትና ንኻልኦት ክንምስጥ ኣብ ክንዲ እንጽዕር: ቃል ኣምላኽ ካብቲ ንሕና እንብሎ ዝያዳ ዘእምን ከም ዝዀነ ስለ እንፈልጥ ናብኡ ኸም ዘተኵሩ ኢና እንገብሮም። (1 ቈረ. 2:1-5፣ እብ. 4:12) ንየሱስ ክንመስሎ ስለ እንደሊ: ኵሉ ውዳሰ ንየሆዋ ኢና እንህቦ።—ማር. 10:17, 18
3 ኣብ ጉባኤ:- ክርስትያናት ‘ንሓድሕዶም ትሕትና ኽዕጠቑ’ ኣለዎም። (1 ጴጥ. 5:5) ካልኦት ካባና ዝበልጹ ጌርና እንተ ርኢናዮም: ኣሕዋትና ኸገልግሉና ኣብ ክንዲ ምጽባይ ንኸነገልግሎም ኢና መገድታት እነናዲ። (ዮሃ. 13:12-17፣ ፊል. 2:3, 4) መአከቢ ኣደራሽ ምጽራይ ክብርና ዘዋርድ ኰይኑ ኣይስምዓናን እዩ።
4 ትሕትና ‘ብፍቕሪ ንኽንጸዋወር’ ትሕግዘና: በዚ ኸኣ ኣብ ጉባኤ ሰላምን ሓድነትን ይሰፍን። (ኤፌ. 4:1-3) ነቶም መሪሕነት እተዋህቦም ንኽንግዝኦም ትሕግዘና። (እብ. 13:17) ዝዀነ ይኹን ዝወሃበና ማዕዳ ወይ ተግሳጽ ንኽንቅበል ትድርኸና። (መዝ. 141:5) ኣብ ርእሲ እዚውን ኣብ ጉባኤ ንዝወሃበና ዝዀነ ይኹን ሓላፍነት ንምፍጻም ኣብ የሆዋ ንኽንውከል ተለዓዕለና። (1 ጴጥ. 4:11) ልክዕ ከም ዳዊት: እቲ እንረኽቦ ኣሳልጦ ኣብ ክእለትና ዘይኰነስ ኣብ በረኸት የሆዋ እዩ ዝምርኰስ።—1 ሳሙ. 17:37
5 ኣብ ቅድሚ ኣምላኽና:- ልዕሊ ዅሉ ኸኣ ‘ኣብ ትሕቲ እታ ጽንዕቲ ኢድ ኣምላኽ ትሕት ክንብል’ ኣሎና። (1 ጴጥ. 5:6) ፈታኒ ዅነታት ከጋጥመና ኸሎ: ነቲ መንግስቲ ኣምላኽ እተምጽኦ ራህዋ ሃረር ንብል ንኸውን። እንተዀነ ግን: ካብ ትሕትና ተበጊስና የሆዋ ኣብ ግዜኡ መብጽዓታቱ ንኽፍጽም ብትዕግስቲ ኢና እንጽበዮ። (ያእ. 5:7-11) ከምቲ እዮብ ንጽህናኡ ኽሕሉ ኸሎ ዝገበሮ: ንዓናውን እቲ ቐንዲ ዘተሓሳስበና ነገር ‘ስም የሆዋ ክባረኽ’ እዩ።—እዮብ 1:21 NW
6 ነብዪ ዳንኤል ‘ርእሱ ኣብ ቅድሚ ኣምላኹ ኣትሓተ:’ ሞገስ የሆዋን ብዙሕ ናይ ኣገልግሎት መሰላትን ብምርካብ ከኣ ተባረኸ። (ዳን. 10:11, 12) ንሕናውን ብተመሳሳሊ “ዓስቢ ትሕትናን ፍርሃት እግዚኣብሄርንሲ ሃብትን ክብረትን ህይወትን” ምዃኑ ስለ እንፈልጥ: ትሕትና ንልበስ።—ምሳ. 22:4