እምነትና ንሰናይ ግብሪ ትድርኸና
1 እምነት ንኖህ: ንሙሴ: ንረሃብ ስጕምቲ ንኽወስዱ ደሪኻቶም ኢያ። ኖህ ንድሕነት እትኸውን መርከብ ሰርሐ። ሙሴ ኣብ ቤተ-መንግስቲ ፈርኦን ክረኽቦ ዝነበሮ ግዝያዊ ረብሓታት ህይወት ራሕረሖ። ረሃብ ነቶም ሰለይቲ ሓብኣቶም: ንዝሃብዋ መምርሒ ብምእዛዝ ከኣ ስድራቤታ ኣድሓነት። (እብ. 11:7, 24-26, 31) ሎሚኸ እምነትና እንታይ ዓይነት ጽቡቕ ፍረ ኸነፍሪ ኢያ እትድርኸና፧
2 ምስክርነት ምሃብ:- እምነት ብዛዕባ እቲ ግሩም ኣምላኽናን ዘለኣለማዊ ሓጐስ ንምምጻእ ዝገበሮ ምድላዋቱን ንኽንዛረብ ትድርኸና። (2 ቈረ. 4:13) ሓድሓደ ግዜ ምስክርነት ንምሃብ ነግ ፈረግ ንብል ንኸውን። ይኹን እምበር: ንየሆዋ ‘ኵሉ ጊዜ ኣብ ቅድሜና እንተደኣ ጌርናዮ’ ሓይሊ ንረክብ: ፍርሂ ኸኣ ካባና የልግስ። (መዝ. 16:8) ሽዑ እምነትና ኣብ ዝረኸብናዮ ምሹእ ኣጋጣሚ ንኣዝማድና: ንጐረባብትና: ንመሳርሕትና: ንመማህርትናን ንኻልኦትን ነቲ ብስራት ንኽንነግሮም ትድርኸና።—ሮሜ 1:14-16
3 ሓቢርካ ምእካብ:- ካልእ ካብ እምነት ዝምንጭ ሰናይ ግብሪ ኸኣ ኣብ ኣኼባታት ስርዓታዊ ዄንካ ምክፋል ኢዩ። እዚ ኸመይ ኢሉ ኢዩ ከምኡ ዝኸውን፧ ኣብ ክርስትያናዊ ኣኼባታት ምእካብና የሱስ ብናይ ኣምላኽ መንፈስ ቅዱስ ኣቢሉ ምሳና ምህላዉ ከም ዝኣመንናሉ ዘረጋግጽ ኢዩ። (ማቴ. 18:20) ‘እቲ መንፈስ ንማሕበራት ዝብለን ዘሎ ንምስማዕ’ ባህጊ ከም ዘሎና ዘርኢ ኢዩ። (ራእ. 3:6) እምነት: እንተ ሃልያትና የሆዋ ዓብዪ መምህርና ምዃኑ ንኽንግንዘብ ስለ እትሕግዘና ነቲ ዝወሃበና ትምህርቲ ኣርዚንና ኢና እንቕበሎ።—ኢሳ. 30:20
4 እንገብሮ ምርጫታት:- ነቲ ዘይርአ ነገራት ኣጸቢቕና ምስ እንኣምነሉ: አብ ህይወትና ንመንፈሳዊ ነገራት ቀዳምነት ንኽንህቦ ይድርኸና ኢዩ። (እብ. 11:1) እዚ ማለት ሓድሓደ ግዜ ስጋዊ ነገራት መስዋእቲ ምግባር ይሓትት ኢዩ። ንኣብነት: ሓደ ሽማግለ እቲ ዝረኸቦ ዕቤት ስራሕ ካብ ናይ ጉባኤ ኣኼባታት ምብኳር: ካብ ስድራቤት ምፍላይ: ከምኡውን ነቲ ናይ ፓይነር ኣገልግሎቱ ምቍራጽ ስለ ዘስዕበሉ ነጸጎ። ንሕናውን ብተመሳሳሊ የሆዋ ነቶም ‘ቅድም መንግስቲ ኣምላኽን ጽድቁን ዝደልዩ’ ንህይወቶም ዘድልዮም ከም ዝህቦም ዝሕብር ኣብ መጽሓፍ ቅዱስ ዘሎ መረጋገጺ ምሉእ እምንቶ ንግበረሉ።—ማቴ. 6:33
5 እምነት ኣብ ናብራ ህይወትና እትገብሮ ሓያል ጽልዋ ካልኦት ከየስተብሃልሉ ኣይተርፉን ኢዮም። እወ: እምነትና ኣብ ኵላ ምድሪ እተፈልጠት ኢያ። (ሮሜ 1:8) ስለዚ እምበአር: ኵላትና እምነትና ህያው ምዃና ብሰናይ ግብርና ነርኢ።—ያእ. 2:26