“ተጋደሉ”
1 ገዛእ ርእስና ንየሆዋ ክንውፊ ከሎና: እቲ ዝበለጸ ክንህቦ ኢና ተማባጺዕና። ምስዚ ዝሰማማዕ ድማ: ሃዋርያ ጴጥሮስ ነቶም ኣብ ቀዳማይ ክፍለ-ዘበን ዝነበሩ ክርስትያናት ነቲ ኣብ ቅድሚ የሆዋ ዘለዎም ኣቃውማ ኣጽኒዖም ንምሓዝ ክጋደሉ ኣተባቢዕዎም ኢዩ። (2 ጴጥ. 1:10) ሎሚ ንየሆዋ ከነገልግል ከሎና ንኸነሐጕሶ ክንጋደል ከም እንደሊ እተረጋገጸ ኢዩ። እዚ እንታይ ኢዩ ዘጠቓልል፧ ምስ የሆዋ ዘሎና ርክብ ምስ ዝዓምቝ በቲ ኵሉ ዝገበረልና ድማ ምስ እነስተንትን: ኣብ ኣገልግሎቱ ዝከኣለና ንኽንገብር ልብና ኵሉ ግዜ ከለዓዕለና ኢዩ። ኣገልግሎትና ዝበለጸ ክንገብሮ: ዝከኣል ምስ ዝኸውን ድማ ዓቐኑ ክንውስኸሉ ንደሊ ኢና።—መዝ. 34:8፣ 2 ጢሞ. 2:15
2 ኣብቲ ኣገልግሎት ዝያዳ ክዓዪ ዝደ ለየ ሓደ መንእሰይ ሓው: ስርዓታዊ ኴንካ ቃል ኣምላኽ ምጽናዕ ንየሆዋ ዘለዎ ሞሳ ዘዕምቝን ዝዓበየ ቅንኢ ዘሕድረሉን ኰይኑ ረኸቦ። እዚ ድማ ፓይነር ኰይኑ ከገልግል ኣለዓዓሎ። ንዘይትፈልጦም ሰባት ምዝራብ ኣጸጋሚ ዝዀና ዝነበረ ሓንቲ ሓብቲ: ንገለ ካብቲ ኣብ መጽሓፍ ምምርማር (እንግሊዝኛ) ዘሎ ኣቀራርባታት ተለማመደትሉ እሞ: ሽዑ ንሽዑ ኣብ ኣገልግሎታ ዝዓበየ ኣሳልጦ ከትረክብ ጀመረት። ሰብ ሓዳር ምስ ዝዀኑ ሰብኣይን ሰበይትን ጽንዓት መጽሓፍ ቅዱስ ክትዓዪ ከኣለት: ንሳቶም ድማ ሓቂ ተቐበሉ።
3 በቲ ክትገብሮ እትኽእል ተሓጐስ:- ገሌና ከም ጥዕና ምስኣን: ናይ ስድራቤት ምጽራር: ድኽነት: ወይ ኣብቲ ዞባ ዘለዉ ሰባት ዘርእይዎ ናይ ዘይምግዳስ መንፈስ ዝኣመሰለ ኣሸጋሪ ኵነታት የጋጥመና ኢዩ። ኣብዘን ዳሕሮት መዓልትታት ልሙድ ዝዀነ ካልእ ብዙሕ ግድላት ድማ ኣብ ኣገልግሎትና ዕንቅፋት ክዀነና ይኽእል ይኸውን። (ሉቃ. 21:34 NW እግረ-ጽሑፍ፣ 2 ጢሞ. 3:1) እዚ ግን ኣብቲ ንየሆዋ ዝገበርናዮ ወፈያ ሰኒፍና ማለት ድዩ፧ ክሳዕ ዝከኣለና እንተድኣ ተጋዲልና ሰኒፍና ማለት ኣይኰነን።
4 ንገዛእ ርእስና በቲ ካልኦት ክገብርዎ ዝኽእሉ ገይርና ክንፈርዳ ጥበባዊ ኣይኰነን። ኣብ ክንድኡስ: ቅዱሳት ጽሑፋት ‘ነፍሲ ወከፍ ነታ ግብሪ ርእሱ ክምርምር’ ኢዩ ዘተባብዓና። ብብሕትና ክሳዕ እቲ እንኽእሎ ገዛእ ርእስና ምሉእ ብምሉእ ምውፋይ ንየሆዋ የሐጕሶ ንዓና ድማ “የሐጕሰና።” (NW )—ገላ. 6:4፣ ቈሎ. 3:23, 24
5 ነቲ “ብዘይ ነውርን ብዘይ መንቅብን ብሰላም ኣብ ቅድሚኡ [ኣምላኽ] ኽትርከቡ ተጋደሉ” ዝብል ቃላት ጴጥሮስ እነቕልበሉ ይግበረና። (2 ጴጥ. 3:14) እዚ መንፈስ እዚ ዕቝባ ከም ዝስምዓና ክገብር: ከምኡውን ነቲ ካብ የሆዋ ጥራይ ክርከብ ዝከኣል ናይ ኣእምሮ ሰላም ክህበና ኢዩ።—መዝ. 4:8