ብዙሓት ይውሰኹ ኣለዉ
1 ልክዕ ከምቲ ኣብ ቀዳማይ ክፍለ-ዘበን ዝነበረ: ሎሚ እውን ክርስትያናዊት ጉባኤ እተርእዮ ዘላ ዕቤት ጕሉሕ ኢዩ። (ግብ. 2:41፣ 4:4) ዝሓለፈ ዓመት 366,579 ሓደስቲ ደቀ መዛሙርቲ ተጠሚቖም ኢዮም: እዚ ድማ ብገምጋም ልዕሊ 1,000 ኣብ መዓልቲ ምዃኑ ኢዩ! ኣብዘን ዝሓለፋ ሰለስተ ዓመታት ልዕሊ ሓደ ሚልዮን ሰባት ተጠምቁ። ብርግጽ: የሆዋ ብዙሓት ኣመንቲ ብቐጻሊ ይውስኽ ኣሎ።—ግብ. 5:14
2 እቶም ተመክሮ ናይ ክርስትያናዊ ኣነባብራ ዝጐድሎም ብዙሓት ሓደስቲ: ካብቶም ኣብ እምነት ብርቱዓት ዝዀኑ ሓገዝን ምልምማድን የድልዮም ኢዩ። (ሮሜ 15:1) ገለ ካብቶም ቀዳሞት ክርስትያናት: ዓመታት ድሕሪ ምጥማቖም እውን ከይተረፈ’ ‘ናብ ፍጻሜ ምሕላፍ [“ኣብ ብስለት ምብጻሕ:” NW ]’ ዘይከኣሉ ነይሮም ኢዮም። (እብ. 5:12፣ 6:1) በዚ ምኽንያት እዚ ኸኣ ኢዩ: ጳውሎስ ኣብቲ ንእብራውያን ዝጸሓፎ ደብዳበኡ ክርስትያናት ብመንፈስ ክምዕብልሉ ዘድልዮም መዳያት ዘጕልሐ። እዚ መዳያት እዚ እንታይ ኢዩ: ኣድላዪ ሓገዝ ክወሃብ ዝከኣልከ ብኸመይ ኢዩ፧
3 ጽቡቕ ናይ መጸናዕቲ ልምዲ ምሓዝ:- ምስቲ ናይ ጳውሎስ መምርሒ ብምስምማዕ: ንፉዕ ተማሃራይ ምዃን ብንጥፈት ምምሃር: ነቲ እተማሃርካዮ ምድጋም: ከምኡውን ነቲ ብማሕበር የሆዋ ዝወሃብ “ዕጹም ብልዒ” ምውሳድ ዘጣመረ ኢዩ። (እብ. 5:13, 14፣ ናይ ነሓሰ 15 1993 ግምቢ ዘብዐኛ [እንግሊዝኛ] ገጽ 13-16 ርአ።) ንሓደስቲ ኣመንቲ ኣብ መንፈሳዊ ዕላል ከም ዝኣትዉ ብምግባርን ነቲ ብናይ ብሕቲ ምርምር ዝረኸብካዮ ክቡር ዕንቊ ናይ ቃል ሓቂ ምስኣቶም ብምምቓልን: ብምክፋልን ጽቡቕ ናይ መጸናዕቲ ልምዲ ንኽሕዙ ከተለዓዕሎም ትኽእል ኢኻ። ምናልባት ሓድሓደ ግዜ ንሓደ ሓድሽ ኣማኒ ኣብቲ ናይ ብሕትኻ ወይ ከኣ ኣብቲ ናይ ስድራቤትካ መጽናዕቲ ክሓብር ክትዕድሞ ትኽእል ኢኻ።
4 ኣኼባታት ስርዓታዊ ኴንካ ምክፋል:- እቲ ተኣማንነት ዝመልኦ ኣብነትካን ፍቕሪ ዘሎዎ መተባብዒ ቃላትካን ነቶም ሓደስቲ ኣባላት ጉባኤ ብጳውሎስ ተጠቒሱ ዘሎ ካልእ ዘሻቕል ነገር ከወግዱ ክሕግዞም ኢዩ: እዚ ኸኣ ኣኼባታት ናይ ምትራፍ “ልማድ” ኢዩ። (እብ. 10:24, 25) ኣኼባታት: ክፍሊ ናይታ ጉባኤ ዝገብሮም መንፈሳዊ መድሕን ነብሲ ምዃኑ ክግንዘቡ ሓግዞም። ከም ኣባላት ሕውነትና መጠን ቅቡላት ምዃኖም ከም ዝስምዖም ንኽትገብር ተበግሶ ውሰድ።
5 ንየሆዋ ብእምንቶ ምቕራቡ:- ስጋዊ ድኻም ከምኡውን ናይ ባህሪ ኣበር ንምስናፍ: ውሽጣዊ ሓሳብናን እቲ ኣዝዩ ዘጨንቐና ነገርን ብምግላጽ ንየሆዋ ብጸሎት ክንደልዮ ይግብኣና። ከምቲ ጳውሎስ ዘተባብዖ: ሓደስቲ ኣሕዋት ንየሆዋ ሓገዝ ምልማን ክስልክዩ ከም ዘይብሎም ክማሃሩ ይግብኦም። (እብ. 4:15, 16፣ 10:22) ነዚ ዝምልከት ብሕታዊ ተመክሮኻ ምንጋሩ: የሆዋ ልባዊ ጸሎት ዝሰምዕ ምዃኑ ነቲ ሓድሽ ክርስትያን እምንቶኡ ከበራትዓሉ ኢዩ።
6 ንኣገልግሎት ዝኸውን ግዜ ምምዳብ:- ጳውሎስ ‘ንኣምላኽ ኵሉ ሳዕ መስዋእቲ ምስጋና ከነቕርበሉ’ ከሎና ብመንፈስ ንበራታዕ ምዃንና ገሊጹ ኢዩ። (እብ. 13:15) ሓደ ሓድሽ ወደ መዝሙር ኣብቲ ሰሙናዊ ናይ ግራት ኣገልግሎት መደብካ ክሓብረካ ክትዕድሞ ትኽእልዶ፧ ምናልባት ክልቴኹም ኴንኩም ሓደ ጽሑፍ ንምዕዳል ኣቀራርባ ክተዳለዉ: ወይ ከኣ እቲ ሓድሽ ኣስፋሒ ገና ዘይፈተኖ ዓይነት ኣገልግሎት ክትዓዩ ትኽእሉ ኢኹም።
7 እቶም ዝውሰኹ ዘለዉ ብዙሓት ሰባት ምኽንያት ናይ ዓቢ ሓጐስ ኢዮም። ንሓደስቲ ኣባላት ናይታ ጉባኤ ኣብ ምልምማድን ምትብባዕን ምስ እነስተብህል “ምድሓን ነፍሶም” ንኽረኽቡ ዘድልዮም ብርቱዕ እምነት ንኸማዕብሉ ክንሕግዞም ኢና።—እብ. 3:12, 13፣ 10:39