“‘እወ’ ኽንብሎ ንደሊ ኢና”

ኣብ ናይጂርያ ዚርከብ ጨንፈር ቤት ጽሕፈት ናይ የሆዋ መሰኻኽር ከምዚ ዚስዕብ እትብል ደብዳበ ተቐበለ:-

“ኣንደርሰን ወድና ኣብ 14 ዓመቱ እዩ ሞይቱ። ቀቅድሚ ሙማቱ ግና ኽልተ ደርሁ የፋሪ ነይሩ። ንዐአን ሸይጡ ድማ ነቲ ገንዘብ ንድጋፍ እቲ ዓለምለኻዊ ስብከት ኪሰዶ ድሌት ነበሮ። ይኹን እምበር: ከይሸጠን እዩ ሞይቱ።

“ድሌቱ ንምምላእ: ንሕና ወለዱ ነተን ደርሁ ኣዕቢና ሸጥናየን። እንሆ ኸኣ ነተን ገንዘብ ንሰደን ኣለና። ኣብቲ የሆዋ ዝሃቦ ተስፋ ስለ እንውከል: ንኣንደርሰን ድሕሪ ቕሩብ እዋን ከም እንረኽቦ ምሉእ ተስፋ ኣሎና። ሓሳብ ልቡ ኣማሊእናሉ እንተደኣ ዄንና ምስ ሓተተና: ‘እወ’ ኽንብሎ ንደሊ ኢና። ንኣንደርሰን ጥራይ ዘይኰነስ: ነቶም ‘ደበና ምስክር’ እውን ኣብ ግዜ ትንሳኤ ኽንረኽቦም ብሃንቀውታ ንጽበ ኢና።”—እብራውያን 12:1፣ ዮሃንስ 5:28, 29

ኣብዛ ኣብ ላዕሊ ዝረኣናያ ደብዳበ ኸም እተንጸባረቐ: ተስፋ ትንሳኤ ንክርስትያናት ዜተባብዕ እዩ። እተን ዜፍቅራኦም ኣባላተን ዚሞትወን ብሚልዮናት ዚቝጸራ ስድራቤታት ንምዉታተን ኪቕበላኦም ከለዋስ ኣየ ኽንደይ ዜሐጕስ ኰን እዩ!—1 ቈረንቶስ 15:24-26

ትንሳኤ ሓደ ኻብቲ ኣብ ትሕቲ እታ ብመንግስቲ ኣምላኽ እትመሓደር ጽድቂ ዝሰፈና ሓዳስ ዓለም ዚፍጸሙ ዜደንቕ ነገራት ከም ዝዀነ ቓል ኣምላኽ ይነግረና። (2 ጴጥሮስ 3:13) ሽዑ ኣምላኽ ንደቅሰብ እንታይ ከም ዚገብረሎም መጽሓፍ ቅዱስ ኪገልጽ ከሎ: “ኣምላኽ ከኣ ንብዘሎ ንብዓት ካብ ኣዒንቶም ኪደርዝ እዩ። እቲ ቐዳማይ ሐሊፉ እዩ እሞ: ድሕሪ ደጊም ሞት ኣይኪኸውንን: ድሕሪ ደጊምውን ሓዘን: ወይ ጫውጫው: ወይ ጻዕሪ ኣይኪኸውንን እዩ” ይብል።—ራእይ 21:4