‘ናብ ኣንፊ ብልሒ ዲኻ ተድሓርሕር ዘለኻ፧’

እቲ ኣብ መጽሓፍ ቅዱስ ኣንፊ ብልሒ ተባሂሉ ዘሎ ንሓደ ኣብ ጫፉ በሊሕ ሓጺን ዝርከቦ በትሪ ዘመልክት ኰይኑ: ከቢድ ጽዕነት ንዝጐቱ እንስሳታት ደው ንኸይብሉን ኣንፈቶም ንኸይስሕቱን ንምቕላስ ዝጥቀሙሉ ዝነበሩ እዩ። እቲ እንስሳ ብድርቅና ናብ ኣንፊ እቲ ብልሒ ገጹ እንተ ኣድሓርሒሩ ግን እንታይ እዩ ዝኸውን፧ ኣብ ክንዲ ዕረፍቲ ዝረክብ: ኣብ ርእሱ እዩ ስቓይ ዘምጽእ።

እቲ ኻብ ሞት ዝተንስአ የሱስ ክርስቶስ ንሓደ ሳውል ዝበሃል ንገሊኣቶም ደቀ መዛሙርቲ የሱስ ሒዙ ንኽኣስር ዝጐዓዝ ዝነበረ ሰብኣይ ክዛረቦ ኸሎ: ብዛዕባ ኣንፊ ብልሒ ጠቒሱ ኣሎ። ሳውል ኣብ መንጎ እቲ ዘዐውር ብርቱዕ ብርሃን “ሳውል: ሳውል: ከመይከ እትሰጐኒ፧ ናብ ኣንፊ ብልሒ እንተ ኣድሐርሐርካ: ንኣኻ ይገደካ” ዝብል ቃላት የሱስ ሰምዐ። ሳውል ንክርስትያናት ብምግፋዑ ምስ ኣምላኽ እዩ ዝብኣስ ነይሩ: እዚ ድማ ጕድኣት ጥራይ እዩ ኸምጽኣሉ ዝኽእል።​—⁠ግብሪ ሃዋርያት 26:14

ንሕናኸ ምናልባት ከይፈለጥና ‘ናብ ኣንፊ ብልሒ ነድሓርሕር’ ደዀን ንህሉ ንኸውን፧ መጽሓፍ ቅዱስ ን“ቃላት ጠቢባን” ምስቲ ብቕኑዕ ኣንፈት ንኽንመላለስ ዝድርኸና ሽካል ወይ ብልሒ እዩ ኣመሳሲልዎ ዘሎ። (መክብብ 12:11) እቲ ኣብ ቃል ኣምላኽ ዝርከብ መንፈስ ዝነፈሶ ማዕዳ ንኽጸልወና እንተ ፈቒድናሉ: ብቕኑዕ መገዲ ንኽንመላለስ ድራኸ ክዀነናን ክመርሓናን ይኽእል እዩ። (2 ጢሞቴዎስ 3:16) እንተ ተጻሪርናዮ ግን ንርእስና ኢና እንጐድእ።

ሳውል ንቓላት የሱስ ኣብ ልቡ ኣሕደሮ: መገዱ ቐየረ: ሃዋርያ ጳውሎስ ተባሂሉ ዝጽዋዕ ፍቑር ክርስትያን ድማ ኰነ። ንሕናውን ኣምላኽ ዝህበና ማዕዳ ምስ እንሰምዕ ዘለኣለማዊ በረኸት ኢና እንረክብ።​—⁠ምሳሌ 3:1-6

[ኣብ ገጽ 32 ዘሎ ምንጪ ስእሊ]

L. Chapons/Illustrirte Familien-Bibel nach der deutschen Uebersetzung Dr. Martin Luthers