ናእዳ ዘትረፈ “ፍሉይ” ዓቢ ኣኼባ

ኣብ ሊማ: ፔሩ ዝርከብ ሓደ ናይ ረድዮ ጋዜጠኛ ብዛዕባ ናይ የሆዋ መሰኻኽር ምጥርጣር ነበሮ። ኣብ ሓደ ካብ ኣውራጃዊ ኣኼባታቶም ምስ ተኻፈለ ግን: ኣረኣእያኡ ሃንደበት ተቐየረ። ካብ ምምሳጡ እተላዕለ ድማ ነቶም ናይ ረድዮ ሰማዕቱ ናይ ናእዳ ርእይቶታት ኣቕሪብሎም ኢዩ። ቀጺሉ ዘሎ ካብቲ ዝበሎ እተወስደ ኢዩ:⁠-

“እቲ ዓቢ ኣኼባ ብሓቂ ኣዝዩ እተፈልየ ኢዩ ነይሩ። ኣብቲ ምድሪ ቁራጽ ወረቐት እውን ትኹን ኣይወደቐትን: ኣብቲ ኣኼባ እናዞረ ዝሽቅጥ ሰብ ድማ ኣይነበረን። ናይ ማካይን ሕንፍሽፍሽ ኣይነበረን። ሓሙሽተ ሽሕን ክልተ ሚእትን ሰባት ብናይ ገዛእ ርእሶም ወጻኢ ናብቲ ስታድዩም ከዱ: ነፍሲ ወከፎም ድማ ነቲ ቦታ መሕጸብን መፋሕፍሕን ዝኸ​ውን ሳንኬሎ: ቁራጽ ጨርቂ: መወልወሊ: መሕፈሲ ጐሓፍ: መዀስተር: ኣስባስላ: ናይ ኢድ ጓንቲ: ከምኡውን መጽረዪ ኬሚካላት ነበሮ። ምልካይ ዘደልዮ ነገር ምስ ዝህሉ ድማ ይለኽይዎ ነበሩ። ገንዘብከ ካበይ ረኸቡ፧ ካብኣቶም እተረኽበ ኢዩ! ብዛዕባ ክግበር ዘድሊ ነገር ምስ ዝሕበሩ: ኵሎም ብቐልጡፍ ጁባታቶም ሃሰስ ይብሉ። ብሓቂ ኢየ ዝብለኩም: ካቶሊካዊት ቤተ⁠-ክርስትያን ከምዚ ዝበለ ነገራት ክመጽእ ከሎ ተጽቅጥ ኢያ። ንናይ የሆዋ መሰኻኽርን ንኣወሃሃድቲ ናይዚ ኣኼባ እዝን እንቋዕ ኣሐጐሰኩም ክብሎም እፈቱ። ካብ መዓሙቝ ልበይ ዝነቐለ ድማ: ኣምላኽ ይሓግዝኩምን ይባርኽኩምን ክብሎም እፈቱ።”

ናይ የሆዋ መሰኻኽር ኣብዚ ዓመት እዚ ኣብ ምሉእ ዓለም ኣብ ዝርከባ ከተማታት: “ኣምላኻዊ ናብራ” ዘርእስቱ ኣውራጃዊ ኣኼባ ክህልዎም ኢዩ። ኣብኡ ክትርከብ ዲኻ፧

[ኣብ ገጽ 32 ዘሎ ፍረ ሓሳብ]

“ኣብቲ ምድሪ ቁራጽ ወረቐት እውን ትኹን ኣይወደቐትን”