‘ሓቀኛታት ሰባት ኢና እንደሊ’

ኣብዛ ሎሚ ዘላ ዓለም ሓቀኛ ምዃን ሳሕቲ ዝርከብ ነገር ኢዩ። ንክርስትያናት ግን ክህልዎም ዝግባእ መሰረታዊ ብቕዓት ኢዩ። ጳውሎስ “ብዅሉ ደግነት [“ሓቀኛታት ኴንና:” NW ] ክንነብር እናደሌና” ብምባል ጸሓፈ። (እብራውያን 13:18) እታ ኣብ ፋየንዛ: ኢጣልያ እትርከብ ቪልማ እተባህለት ሓንቲ ካብ ናይ የሆዋ መሰኻኽር ከኣ ከምዚ ኢያ ክትገብር ዝደለየት።

ኣብቲ እትነብረሉ ከተማ: ካብ ሓደ ዓቢ ድኳን ወጻኢ: ብዙሕ ገንዘብ ዝሓዘ ማሕፉዳ ምስ ረኸበት ናብቲ ዋንኡ ምእንቲ ክምለስ “ከይተወላወለት” ናብ ፖሊስ ከም ዘረከበቶ እታ ኢል ሬስቶ ዴላ ካርሊኖ (ቋንቋ ኢጣልያ) እተባህለት ጋዜጣ ኣዘንተወት።

እቲ ከንቲባ ብዛዕባ እዚ ምስ ሰምዐ: ብኡንብኡ ንቪልማ ሕጽር ዝበለ ናይ ምስጋና ደብዳበ ጸሓፈላ። “ስለቲ ዝወሰድክዮ ሰናይ ስጕምቲ ብስም እዛ ከተማ እዚኣ አመስግነኪ። እዛ ብልጽቲ ከተማና: ፋየንዛ: ሰናይ ዝገብሩን ሓቀኛታትን ሰባት ኢያ እትድሊ” ብምባል ጸሓፈላ።

ሰናይ ተግባራት ተፈላጥነት ይርከብ ኣይርከብ ብዘየገድስ: ሓቀኛታት ንምዃን ኵሉ ግዜ ክንጽዕር ኣለና። ከምቲ ቅዱሳት ጽሑፋት ዝምዕዶ “ኣብ ቅድሚ ኣምላኽ ጥራይ ዘይኰነስ: ኣብ ቅድሚ ሰብ እውን ኢና ቅኑዕ ዘበለ ንኽንገብር እንጽዕር ዘሎና።”​—⁠2 ቈረንቶስ 8:21 ዘ ጀሩሳሌም ባይብል (እንግሊዝኛ)