“ካብ የሆዋ ዝመጸ ዘደንቕ ውህበት”

እታ ናይ 1 ግንቦት 1996 ግምቢ ዘብዐኛ: ብዛዕባ ክርስትያናዊ ገለልትነትን ኣብቲ ንየሆዋን “ቄሳር”ን ዘሎና ሓላፍነት ድማ ብኸመይ ሚዛናዊ ከም እንገብሮን ዕምቈት ዘለዎ ሓሳባት ሒዛ ኣላ። (ማቴዎስ 22:21) እዚ ሓድሽ ሓበሬታ እዚ ብምድላዉ ካብ ብዙሓት ሰባት ናይ ሞሳ መግለጺታት ተሰሚዑ ኢዩ። ሓደ ካብኡ ድማ ብሓደ ኣብ ግሪኽ ዝነብር ምስክር ናብ ኣመሓዳሪ ኣካል ናይ የሆዋ መሰኻኽር እተጻሕፈ እዚ ዝስዕብ ደብዳበ ኢዩ:-

“ከምዚ ዝኣመሰለ መንፈሳዊ ሓልዮት ስለ ዝገበርኩምልና ንዅሉኹም ፍቑራት ኣሕዋት ዓሚቝ ምስጋናይ ክገልጸልኩም እፈቱ። ብምኽንያት ክርስትያናዊ እምነተይ ንገለ ትሽዓተ ዓመታት ዝኸውን ኣብ ቤት ማእሰርቲ ስለ ዝነበርኩ: ነቲ ኣብ ናይ 1 ግንቦት 1996 ሕታም ግምቢ ዘብዐኛ ዘሎ ዘገርም ሓሳባት ብሓቂ ኢየ ዘማስወሉ። (ኢሳይያስ 2:⁠4) እዚ ካብ የሆዋ ዝመጸ ዘደንቕ ውህበት ኢዩ።​—⁠ያእቆብ 1:​17

“ነዚ ዓንቀጻት እዚ ከስተማቕሮ ከሎኹ: ኣብ ሓደ ኣቐድም ኣቢሉ ዝወጸ ግምቢ ዘብዐኛ (1 ነሓሰ 1994) ‘[ምኽንያታዊ ምዃን] እምበኣር: ብዝያዳ ንየሆዋ ከነፍቅሮ ዝድርኸና ክቡር ባህሪ ምዃኑ ግልጺ ኢዩ’ ዝብል ሓሳባት ዘከርኩ። እወ: ኣሕዋት: ኣነ ክፍሊ ናይታ ብንጹር መገዲ ንጥበቡ እተንጸባርቕ ዘላ ሕያወይትን ፈቃርን ማሕበሩ ብምዃነይ ንየሆዋ አመስግኖ ኢየ።​—ያእቆብ 3:​17

“እቲ ኣብ ናይ 1 ግንቦት ግምቢ ዘብዐኛ ወጺኡ ዘሎ ዝነጸረ ብርሃን በቶም ኣብዚ ኣብ ግሪኽ ዘለዉ ኣሕዋት ብፍላይ ከኣ በቶም ብምኽንያት እምነቶም ኣብ ቤት ማእሰርቲ ነዊሕ ዓመታት ዝገበሩ ወይ ከኣ ጌና ኣብ ቤት ማእሰርቲ ዘለዉ ኣሕዋት ጽቡቕ ተቐባልነት ረኺቡ ኣሎ። እንደገና አመስግነኩም። ኣብዚ ህውከት ዝመልኦ ግዜያት ብቐጻሊ ነቲ ጠቓሚ ዝዀነ መንፈሳዊ መግቢ ከተዳልዉልና የሆዋ ብመንፈሱ ገይሩ የደልድልኩም።”