ናይ መግቢ ፓኮ ምስክርነት ትህብ

ኣብ ኮቤ: ጃፓን: ዝሓለፈ ጥሪ: ድሕሪ እቲ ምንቅጥቃጥ ምድሪ ቀጺለን ኣብ ዝነበራ መዓልትታት: እቶም ኣብቲ እተሃሰየ ቦታታት ዝነበሩ ሰባት መግቢ ንኽረኽቡ ኣዝዩ ኣሸጋሪ ኢዩ ነይሩ። እንተዀነ ግን: ናይ የሆዋ መሰኻኽር: ነቲ ሕያውነት እተሓወሶ ሓገዝ ናይ ብጾቶም ምስጋና ይኹኖ: እኽለ⁠-ማይ ኣይሰኣኑን። ድሕሪ እቲ ምንቅጥቃጥ ኣብ ዝነበረ ናይ መጀመርታ ክልተ ወይ ሰለስተ መዓልቲ: እተን ኣብ ቀረባ ዝነበራ ጉባኤታት ናይ ሩዝ ሕሾታት ሂበናኦም ኢየን። ብዙሕ ከይደንጐዩ ድማ: ሓለይቲ ብጾት ናይ መግቢ ፓኮታት ሰደድሎም። ነቶም እተጠቕዑ ዘለዎም ሓልዮት ዝገልጽ: ኣብቲ ናይ መግቢ ፓኮታት ዝጠበቐ ብዙሕ ንኣሽቱ መዘኻኸሪታት ነይሩ ኢዩ። እቶም ነቲ መግቢ እተቐበሉ ድማ: ነቲ ንኣሽቱ መዘኻኸሪታት ምስ ኣንበብዎ ንብዓቶም ክቈጻጸርዎ ስለ ዘይከኣሉ: ነፍሲ ወከፍ መግቢ ብንብዓት “ዝጠልቀየት” ከም ዝነበረት ተዛረቡ።

ናይ የሆዋ መሰኻኽር ነቲ ዝነበሮም መግቢ ምስ ካልኦት እተሸገሩ ሰባት ተማቒሎምዎ ኢዮም። ሓደ ምስክር ምስ ሓደ ምስኡ ኣብ ሓንቲ ኩባንያ ዝሰርሕ ምስክር ዘይኰነ ካልእ መሳርሕቱ ብማኪና እናተጓዕዘ ከሎ ምስሑ ይበልዕ ነበረ። ሓንቲ ካብተን እተቐበለን ናይ መግቢ ፓኮታት ድማ መቐሎ።

መሳርሕቱ ድማ “እዚ መግቢ ካበይ ገዚእካዮ⁠፧” ክብል ሓተቶ። እቲ ሓው ድማ ብዛዕባ ናይቶም መሰኻኽር ናይ ረድኤት ዕዮ ገለጸሉ። እቲ ሰብኣይ ድማ ብምስጋና “ንንውሕ ዝበለ መዓልትታት ኣሕምልቲ ኣይበላዕኩን። ቁሩብ ከትርፍ እሞ: ንስድራቤተይ ንገዛ ክማልኣሎም” በሎ።

ኣብ መበል ሳልሳይ መዓልቲ: እቲ መሳርሕቱ ነቲ ምስክር 3, 000 የን (ዳርጋ 35 ናይ ሕ.መ.ኣ. ዶላር ዝኸውን) ሃቦ: ከምዚ ድማ በሎ:⁠- “ምስ ንጥፈታትኩም ስለ እተላለኹ: በጃኻ ንዕዮኹም ወፈያ ክገብር ኣፍቕደለይ። ነቲ ምሳሕካ ምሳይ ምክፋልካ አመስግን። ብሓቂ: ብጾትካ ኵሎም ሕያዎት ሰባት ኢዮም።”