ካብ ኣዕዋፍን ዕንባባታትን ዝርከብ ትምህርቲ

ሎሚ ንሰባት ልዕሊ ዅሉ ዘገድሶም ነገር እንታይ ኢዩ፧ ንብዙሓት: ንስድራቤቶም እዅል ዝዀነ ነገራት ክህልዎም ወይ ድማ ኵነታት ናብራኦም ንከመሓይሹ ክኽእሉ ኢዩ።

የሱስ ኣብ ምድሪ ከሎ እውን: እቲ ምትእኽኻል ዝብል ንብዙሓት እቲ ቀንዲ ዘገድሶም ነገር ኢዩ ነይሩ። እንተዀነ ግና: እዚ ቅቡል ዝዀነ ምግዳስ እዚ ዝዕብልል ጭንቀት ኰይኑ: ንመንፈሳዊ ነገራት ከይሽፍኖ ኣጠንቂቑ ኢዩ። ነዚ ሓሳባት እዚ ንምብራህ: የሱስ ንደቀ መዛሙርቱ ናብ ኣዕዋፍን ዕንባባታትን ኣጸቢቖም ክዕዘቡ ነገሮም።

ኣዕዋፍ መዓልቲ መዓልቲ ክበልዓ ኣለወን​—⁠ብምኽንያት እቲ ዘለወን ልዑል ናይ ምሕቓቕ ፍጥነት ድማ ብተመጣጣኒ ካብቲ ንሕና እንበልዖ ንላዕሊ ኢየን ዝበልዓ። ምስ እዚ ዅሉ ድማ ዘርኢ ኣይዘርኣ: ኣይዓጽዳ: ወይ ንዝመጽእ ግዜ ኣብ ማዕከን ክእክባ ኣይክእላን ኢየን። ጌና ግን: ከምቲ የሱስ ዝበሎ ‘ናይ ሰማይ ኣቦና ኢዩ ዝምግበን።’ (ማቴዎስ 6:26) ብተመሳሳሊ: ኣምላኽ ን“ሳዕሪ መሮር” በቲ ዝጸበቐ ክዳን ይኸድኖም ኢዩ።​—⁠ማቴዎስ 6:​28-30

የሱስ: ንስጋዊ ነገራት ኣብቲ ግቡእ ቦታኡ ብምሓዝ ንመንፈሳዊ ነገራት ምስ እነቐድም: ኣምላኽ ድማ እቲ ዘድልየና መግብን ክዳንን ከም ዝቕርበልና ኣረጋጊጹልና ኢዩ። የሆዋ ኣምላኽ ነዕዋፍን ዕንባባታትን ዝሓልየሎም ካብ ኰነ: ነቶም ዘፍቅርዎን ‘ቅድም ድማ መንግስቲ ኣምላኽን ጽድቁን ዝደልዩ’ ብርግጽ ይሓ​ል⁠የሎም ኢዩ። (ማቴዎስ 6:33) ኣብ ናብራኻ ኣድላይነት መንግስቲ ኣምላኽዶ ተቐድም ኣሎኻ፧