ስርዓታት መንግስቲ ኣምላኽ—ጽድቂ ኣምላኽ ምድላይ

ንጐረቤትካ ብማዕዶ ሰላም ኢልካ ኽትሓልፍ ትብል። ኣብ ቀረባ ግዜ፡ ንዓኻን ንስድራ ቤትካን ይዕዘበኩም ከም ዝቐነየ ኣስተብሂልካ ኢኻ። ንሱ ድማ ኢዱ ድሕሪ ምውዝዋዙ፡ ክትመጾ የመልክተልካ። “ሓንቲ ሕቶዶ ኽሓትተካ፧ ንዓኻትኩም እተፈለኹም ዚገብረኩም እንታይ እዩ፧” ኢሉ ይሓትተካ። ንስኻ ኸኣ፡ “እንታይ ማለትካ ኢኻ፧” ኢልካ መሊስካ ተሓትቶ። ንሱ ድማ፡ “ማለተይሲ፡ ንስኻ ናይ የሆዋ ምስክር እንዲኻ፧ ንስኻትኩም ከም ካልኦት ሰባት ኣይኰንኩምን። ምስ ካልኦት ሃይማኖታት ኣይትሰማምዑን ኢኹም፣ በዓላት ኣይተብዕሉን ኢኹም፣ ኣብ ፖለቲካን ኣብ ውግእን ከኣ ኣይትሳትፉን ኢኹም። ሽጋራ እውን ኣይተትክኹን ኢኹም። ስድራ ቤትካ ድማ ጽቡቕ ስነ ምግባራዊ ስርዓታት እዮም ዚስዕቡ። ብብዙሕ መገዲ እተፈለኹም ከም እትዀኑ ዚገብረኩም እንታይ እዩ፧” ኢሉ ይሓትተካ።

መልሲ እቲ ሕቶታቱ ብሓጺሩ እንታይ ምዃኑ ትፈልጦ ኢኻ፦ ኣብ ትሕቲ ግዝኣት መንግስቲ ኣምላኽ ኢና እንነብር። የሱስ ንጉስ ብምዃኑ ወትሩ የጽርየና እዩ ዘሎ። ኣስኣሰሩ ኽንስዕብ፡ ኣብዛ እክይቲ ዓለም ከኣ እተፈለና ኽንከውን የተባብዓና እዩ ዘሎ። ኣብዚ ኽፋል እዚ፡ እታ መሲሓዊት መንግስቲ ንህዝቢ ኣምላኽ ብመንፈሳውን ብስነ ምግባራውን ብውድባውን መዳይ ከመይ ገይራ ኸተጽርዮም ከም ዝጸንሐት ክንርኢ ኢና፣ እዚ ዅሉ ድማ ንኽብሪ የሆዋ እዩ።