ሓቂ መንግስቲ—ኣምላኽ መንፈሳዊ ምግቢ ምዕዳል

መጽሓፍ ቅዱስ እትምህሮ ሰብ፡ ትርጕም እቲ ብሓባር ዘንበብኩምዎ ጥቕሲ መጽሓፍ ቅዱስ ምስ ተረድኦ፡ ኣዒንቱ ኺበርህ ትርኢ። ቀስ ኢሉ፡ “ኣብዛ ምድሪ እዚኣ፡ ኣብ ገነት ንዘለኣለም ክንነብር ከም እንኽእልሲ መጽሓፍ ቅዱስ ይምህር ዲኻ እትብለኒ ዘለኻ፧” ኢሉ ይሓትተካ። መገላግልትኻ ኸኣ ፍሽኽ ኢሉ፡ “መጽሓፍ ቅዱስ እንታይ እዩ ዚብል ዘሎ፧” ኢሉ መሊሱ ይሓትቶ። እቲ ተመሃራይ ብምግራም ርእሱ እናነቕነቐ፡ “ንዓይ ገሪሙኒ ዘሎ ግና፡ ቅድሚ ሕጂ ኸምዚ ዝበለ ሰሚዐ ዘይምፍላጠይ እዩ” ይብል። ቅድሚ ሒደት ሰሙናት፡ የሆዋ ስም ኣምላኽ ምዃኑ ንፈለማ ግዜ ምስ ተማህረ፡ ከምኡ ኢሉ ኸም ዝነበረ ድማ ትዝ ይብለካ።

ከምዚ ዝበለ ተመክሮ ኣጋጢሙካዶ ይፈልጥ፧ ብዙሓት ህዝቢ ኣምላኽ ኣጋጢምዎም እዩ። ከምዚ ገይሩ ነቲ እተዋህበና ኽቡር ውህበት ዜዘኻኽረና ኻልእ ኣጋጣሚ ዳርጋ የልቦን። እቲ እተዋህበና ውህበት ከኣ ፍልጠት ሓቂ እዩ! ሓንሳእ ደው ኢልካ እሞ ሕሰብ። እቲ ውህበት እቲ ኸመይ ኢሉ ናባኻ በጺሑ፧ ኣብዚ ኽፋል እዚ፡ ነዛ ሕቶ እዚኣ ኽንምርምራ ኢና። ህዝቢ ኣምላኽ በብደረጃ መንፈሳዊ ብርሃን ምርካቦም፡ መንግስቲ ኣምላኽ ናይ ሓቂ ምዃና ዜርኢ ንጹር መርትዖ እዩ። ንሓደ ዘመን፡ ንጉስ እታ መንግስቲ ዝዀነ የሱስ ክርስቶስ ንህዝቢ ኣምላኽ ብንጡፍ ሓቂ ምሂርዎም እዩ።