የሱስ ብዛዕባ መንግስቲ ኣምላኽ መሃረ

የሱስ ናብ ምድሪ ዝመጸሉ ተልእኾ እንታይ እዩ ነይሩ፧ ንሱ ባዕሉ፡ “ስለዚ እየ እተለአኽኩ እሞ፡ ንኻልኦት ዓድታት ድማ ብስራት መንግስቲ ኣምላኽ ክሰብከለን ይግብኣኒ እዩ” በለ። (ሉቃስ 4:43) የሱስ ብዛዕባ እታ ቐንዲ ፍረ ነገር ስብከቱ ዝነበረት መንግስቲ ኣምላኽ፡ እንታይ ኣርባዕተ ነገራት ከም ዝመሃረ እስከ ንርአ።

1. የሱስ ንጉስ ኪኸውን ከም እተመዘዘ። የሱስ ብትንቢት እተነግረሉ መሲሕ ከም ዝዀነ ብቐጥታ ተዛሪቡ እዩ። (ዮሃንስ 4:25, 26) ብተወሳኺ፡ እቲ ነብዪ ዳንኤል ብራእይ ዝረኣዮ ንጉስ ምዃኑ፡ ኣርእዩ እዩ። ንሃዋርያቱ፡ ሓደ መዓልቲ ኣብ “ዝፋን ክብሩ” ኪቕመጥ ምዃኑ፡ ንሳቶም እውን ምስኡ ኣብ ዝፋናት ከም ዚቕመጡ ነገሮም። (ማቴዎስ 19:28) ነዞም ጕጅለ ገዛእቲ እዚኣቶም፡ “ሒደት መጓሰ” ኢሉ ኺጽውዖም ከሎ፡ ክፍሊ እዚ ጕጅለ ዘይኰኑ “ኻልኦት ኣባጊዕ” ከም ዘለውዎ እውን ገሊጹ እዩ።—ሉቃስ 12:32፣ ዮሃንስ 10:16።

2. መንግስቲ ኣምላኽ ጽድቅን ፍትሕን ከም እተስፍን። መንግስቲ ኣምላኽ ንስም የሆዋ ኣምላኽ ብምቕዳስ፡ ካብ ኵሉ እቲ ሰይጣን ካብ ዕልወት ኤድን ኣትሒዙ ዝዀመሮ ጸርፊ ድማ ናጻ ብምግባር፡ ነቲ ዝኸፍአ ምጕዳል ፍትሒ ኸም እትፈትሖ፡ የሱስ ሓቢሩ እዩ። (ማቴዎስ 6:9, 10) ብዘይካዚ፡ ንሰብኡት ኰነ ንኣንስቲ፡ ንሃብታማት ኰነ ንድኻታት ከይፈላለየ መዓልታዊ ብምምሃር፡ ኣድልዎ ኸም ዘይገብር ኣርእዩ እዩ። ተልእኾኡ ብቐዳምነት ንእስራኤላውያን ንምምሃር እኳ እንተ ነበረ፡ ንሳምራውያንን ንኣህዛብን—ንኣይሁድ ዘይኰኑ ማለት እዩ—እውን ሓጊዝዎም እዩ። ካብቲ እቶም ሽዑ ዝነበሩ መራሕቲ ሃይማኖት ብእተፈልየ መገዲ፡ ሌላን ጕሌላን ኰነ ኣድልዎ ኣይገበረን።

3. መንግስቲ ኣምላኽ ካብ ዓለም ከም ዘይትኸውን። የሱስ ህውከት ኣብ ዝነበሮ እዋን እዩ ዚነብር ነይሩ። ዓዱ ኣብ ትሕቲ ባዕዳዊ ሓይሊ እያ ነይራ። ኰይኑ ግን፡ ሰባት ኣብ ፖለቲካ ኼእትውዎ ምስ ፈተኑ፡ ኣበየ። (ዮሃንስ 6:14, 15) ንሓደ ፖለቲከኛ፡ “መንግስተይ ካብዛ ዓለም እዚኣ ኣይኰነትን” በሎ። (ዮሃንስ 18:36) ንሰዓብቱ ኸኣ፡ “ካብ ዓለም ኣይኰንኩምን” በሎም። (ዮሃንስ 15:19) ንዕኡ ንኺከላኸሉሉ ኢሎም እውን እንተ ዀነ፡ ኣጽዋር ውግእ ኪጥቀሙ ኣይፈቐደሎምን።—ማቴዎስ 26:51, 52።

4. ግዝኣት ክርስቶስ ኣብ ፍቕሪ እተመስረተ ኸም ዚኸውን። የሱስ ንሰባት ከም ዜዕርፎምን ጾሮም ከም ዜፍኵሰሎምን ተመባጺዑ እዩ። (ማቴዎስ 11:28-30) ከምቲ ቓሉ ድማ ገይሩ እዩ። ብዛዕባ ዘይምጭናቕ፡ ርክባትካ ብዛዕባ ምምሕያሽ፡ ንፍቕረ-ንዋይ ብዛዕባ ምስናፍ፡ ከምኡውን ሓጐስ ብዛዕባ ምርካብ፡ ፍቕራውን ግብራውን ምኽሪ ሂቡ እዩ። (ማቴዎስ፡ ምዕራፍ 5-7) ፍቕሪ ስለ ዘርኣየ፡ እተፈላለየ መነባብሮ ዝነበሮም ሰባት ይቐርብዎ ነበሩ። እቶም ግፉዓት እውን እንተ ዀኑ፡ ብለውሃትን ብኽብርን ከም ዚሕዞም ይተኣማመኑ ስለ ዝነበሩ፡ ናብኡ ይውሕዙ ነበሩ። የሱስ ከመይ ዝበለ ብሉጽ ገዛኢ ዀን እዩ!

የሱስ ብኻልእ መገዲ ገይሩ እውን ብዛዕባ መንግስቲ ኣምላኽ ምሂሩ እዩ። እወ፡ ብዙሕ ትኣምራት ገይሩ እዩ። ስለምንታይ እዩ ኸምኡ ገይሩ፧ ቀጺልና እስከ ንርአ።

—ኣብ መጽሓፍ ማቴዎስ፣ ማርቆስ፣ ሉቃስ፣ ዮሃንስ እተመስረተ።