ኣዕሩኽ ኣምላኽ ሰናይ ዘበለ ይገብሩ

ሓደ እተድንቖን እተኽብሮን ዓርኪ ምስ ዝህልወካ: ንዕኡ ኽትመስል ኢኻ እትጽዕር። መጽሓፍ ቅዱስ “እግዚኣብሄር ሰናይን ቅኑዕን እዩ” ይብል። (መዝሙር 25:8) ኣዕሩኽ ኣምላኽ ንምዃን: ሰናያትን ቅኑዓትን ክንከውን ኣሎና። መጽሓፍ ቅዱስ “ከም ፍቁራት ውሉድ ሰዓብቲ ኣምላኽ ኩኑ። . . . ከምኡ ብፍቕሪ ተመላለሱ” ይብል። (ኤፌሶን 5:1, 2) ከምዚ ኽንገብረሉ እንኽእል ገለ መገድታት እንሆ:-

ንኻልኦት ሓገዝ። “ንዅሉ ሰብ: . . . ሰናይ ንግበር።”—ገላትያ 6:10

ኣበርቲዕካ ዕየ። “እቲ ዝሰረቐ: . . . ጽቡቕ እናገበረ ደኣ በእዳዉ ይጽዐር እምበር: ደጊምሲ ኣይስረቕ።”—ኤፌሶን 4:28

ብኣካልን ብስነ-ምግባርን ንጹህ ኩን። “ብፍርሃት ኣምላኽ ቅድስና እናመላእና: ካብቲ ስጋን መንፈስን ዜርክስ ዘበለ ዅሉ ርእስና ነንጽህ።”—2 ቈረንቶስ 7:1

ንኣባላት ስድራቤትካ ብፍቕርን ኣኽብሮትን ሓዞም። “ነፍሲ ወከፍኩም ነታ ሰበይቱ ኸም ነፍሱ ገይሩ የፍቅራ: እታ ሰበይቲውን ንሰብኣያ ትፍርሀዮ [“ተኽብሮ:” ትርጕም 1990]። ኣቱም ውሉድ: . . . ንወለድኹም ብጐይታ ተአዘዝዎም።”—ኤፌሶን 5:33–6:1

ንኻልኦት ኣፍቅር። “ፍቕሪ ኻብ ኣምላኽ እያ እሞ: ንሓድሕድና ንፋቐር።”—1 ዮሃንስ 4:7

ንሕግታት ናይታ እትነብረላ ሃገር ተኣዘዝ። “ነፍሲ ወከፍ ነቲ ኣብ ልዕሊኡ ስልጣን ዘለዎ ይገዝኣዮ። እምብኣርስ ግብሪ ንዚግብኦ ግብሪ . . . ንዅሉ እቲ ዘዚግብኦ ሀብዎ።”—ሮሜ 13:1, 7