ናብ ሆንዱራስ እተገብረ ምብጻሕ

ሆንዱራስ ብስጳንኛ፡ “ዕምቈት” ማለት እዩ፣ እዛ ቓል እዚኣ፡ ክሪስቶፈር ኮሎምበስ ነቲ ብሸነኽ ገማግም ኣትላንቲካዊ ውቅያኖስ ዘሎ ማያት ሆንዱራስ ንምግላጽ እተጠቕመላ ቓል ክትከውን ትኽእል እያ። ገሊኦም ሰባት፡ ሆንዱራስ በዚ ምኽንያት እዚ ኸም እተሰምየት እዮም ዚገልጹ።

ተቐማጦ ሆንዱራስ፡ ነቲ ኣብ መንጎ ኣባላት ስድራ ቤት ዘሎ ተኣማንነትን ምትሕብባርን ዓብዪ ግምት እዮም ዚህብዎ። ንኣብነት፡ ንወጻኢታት ስድራ ቤት ወይ ከኣ ንትምህርቲ ውሉዳት ዚምልከት ዓበይቲ ውሳነታት፡ መብዛሕትኡ እዋን ሰብኣይን ሰበይትን ብሓባር ኰይኖም እዮም ዚውስንዎ።

መብዛሕትኦም ነበርቲ ሆንዱራስ፡ መስቲዞስ፡ ማለት ምስ ኤውሮጳውያንን ምስ ደቀባትን እተዳቐሉ እዮም። ከምቶም ቾርቲ ዚብሃሉ ገሊኦም ደቀባት ሆንዱራስ ድማ ክሳዕ ሕጂ ኣለዉ። ከም ጋሪፉና ዝኣመሰሉ ኻልኦት ደቀባት ሆንዱራስ ከኣ፡ ካብ ካልእ ቦታ ዝመጹ እዮም።

ጋሪፉና ዘርኢ ኣፍሪቃውያንን ዘርኢ እቶም ኣብ ደሴት ሰይንት ቪንሰንት ዚነብሩ ዝነበሩ ህንዳውያን ኣመሪካውያንን እዮም። ኣብ ከባቢ 1797 ድማ፡ ኣብ ኢዝላስ ደ ላ ባዪያ (ደሴታት በይ) በጽሑ። ጸኒሖም ከኣ፡ ኣብቲ ኽፍሊ ማእከላይ ኣመሪካ ዝዀነ ገማግም ካሪበያን ኪቕመጡ ጀመሩ። ድሕሪ ግዜ፡ እቶም ጋሪፉና ኣብ ኵሉ ማእከላይን ሰሜንን ኣመሪካ ተበተኑ።

ዓሌት ጋሪፉና፡ ብደረቕ ዕንጨይቲ እተሰርሐ ኸበሮ እናሃረምካ ምስዕሳዕ ባህ እዩ ዚብሎም። ብዘይካዚ፡ ባህሎም፡ ደሚቕ ዝሕብሩ ባህላዊ ኽዳውንቲ ምኽዳንን ዛንታ ምዝንታውን የጠቓልል፣ ኢሪባ ዚብሃል ካብ ሱር ካሳቫ ዚስራሕ ሰፊሕን ረቂቕን ቅጫ እውን የዳልዉ እዮም።

ኣብ ሆንዱራስ ኣስታት 400 ጉባኤ ናይ የሆዋ መሰኻኽር ኣለዋ። ኣኼባታት ብቐንዱ ብስጳንኛ እዩ ዚምራሕ፣ ብዘይካዚ፡ ብሚስኪቶን ብማንዳሪን ቻይንኛን ብቛንቋ ምልክት ሆንዱራስን ብእንግሊዝኛን ብጋሪፉናን እውን ይምራሕ እዩ።