KWADALWA YINI?
Likhono Lemangcamuzane (Cells) Lekwenta Imisebenti Lekhetsekile Emtimbeni
Ngesikhatsi make wakho abanesisu, kuphila kwakho kwacala ngekutsi kube nelingcamuzane lelincane lelibitwa ngekutsi yi-zygote, longeke uze ulibone ngaphandle kwekusebentisa i-microscope. Nobe kunjalo, ngemuva kwetinyanga letimbalwa nje, bese ungumntfwana logcwele. Lelingcamuzane linye lelincane latiphindza futsi lehlukana laba ngemangcamuzane langetulu kwa-200, langalingani, langafani nalenta imisebenti lengafani.
Cabanga: I-zygote yenta lenye i-DNA yayo bese le-zygote yehlukana kabili. Lamangcamuzane lamabili ayachubeka aphindzana tikhatsi letinyenti. Ekucaleni, onkhe lamangcamuzane lamasha asuke afanana. Ku-DNA yawo, lamangcamuzane anato tonkhe ticondziso letiwadzingako kuze ente lamanye emangcamuzane lehlukahlukene.
Ngemuva kweliviki linye umuntfu akhulelwe, lamangcamuzane acala kusebenta ngetindlela letimbili letingafani. Lamanye emangcamuzane aba ngumbungu (embryo), kantsi lamanye aba ngulesikhwama umntfwana lahlala kuso (placenta) kanye naletinye tintfo letidzingekako letingasita lombungu kutsi ukhule.
Ngeliviki lesitsatfu, lamangcamuzane embungu ayatihlela abe tincenye letintsatfu. Emangcamuzane lakulencenye lengephandle asebenta ekwakheni ema-nerves, ingcondvo, umlomo, sikhumba, kanye nalamanye futsi emangcamuzane. Emangcamuzane lakulencenye lesemkhatsini wona aba yingati, ematsambo, tinso, emamasela, kanye naletinye tintfo letifana naleti. Emangcamuzane lakulencenye lengekhatsi wona aba titfo tangekhatsi, njengemaphaphu, i-bladder, kanye nencenye lenkhulu ye-digestive system.
Njengobe lomntfwana losengakatalwa akhula, lamangcamuzane ayaphindzana abe ngemangcamuzane langetulu kwa-200, lenta imisebenti lengafani
Kuso sonkhe lesikhatsi sekukhulelwa, lamanye emangcamuzane ayasuka etincenyeni letitsite tembungu aye kuletinye, kungaba kutsi kuhamba linye lingcamuzane nobe sicumbi. Lamanye emangcamuzane abutsana ndzawonye futsi agocane kuze akhe ema-cords nobe ema-cavities. Kuze kwenteke konkhe loku lamangcamuzane kufanele asebente ngekubambisana. Nasi sibonelo, ngalesinye sikhatsi, emangcamuzane ayagocana kuze akhe emaphayiphi (tubes) lamancane. Loku kwenteka ngesikhatsi lesifanako etindzaweni letehlukahlukene kulombungu. Lamaphayiphi ayanwebeka futsi ehlukane, kodvwa ekugcineni ayahlangana kuze akhe umjikeleto lophelele.
Nakufika sikhatsi sekutsi kutalwe umntfwana lophile kahle, tigidzigidzi temangcamuzane tisuke tente umsebenti lofanele, endzaweni lefanele nangesikhatsi lesifanele.
Ucabangani? Kwatentakalela yini kutsi lamangcamuzane akhone kwenta yonkhe lemisebenti? Nobe kwadalwa?