Bekakhona Mbamba Yini Johane UMbhabhatisi?

EmaVangeli akhuluma ngendvodza lebeyibitwa ngekutsi nguJohane uMbhabhatisi, lebeyishumayela ngeMbuso waNkulunkulu eJudiya. Kuliciniso yini loku lokushiwo liBhayibheli ngalendvodza? Cabanga nganaku:

• LiBhayibheli litsi: “Johane uMbhabhatisi wafike washumayela ehlane laseJudiya, watsi: ‘Phendvukani, ngobe uMbuso wemazulu sewusondzele.’” (Matewu 3:1, 2) Ikhona yini leminye imitfombo lesekela loku? Yebo.

  Sati semlandvo sangelikhulu lekucala Flavius Josephus sakhuluma ngendvodza lebitwa ngekutsi “nguJohane wakaMbhabhatisi,” “leyasita emaJuda kutsi aphile imphilo lelungile,” futsi “atinikele kuNkulunkulu” bese “ayabhajatiswa.”​—I-Jewish Antiquities, Book XVIII.

• LiBhayibheli litsi Johane abehlale akhuta Herodi Antipasi, lebekangumbusi wesifundza saseGalile nesasePheriya. Herodi abengumJuda lebekatsi uphila ngephansi kweMtsetfo. Johane abehlale akhuta Herodi ngekushada nemfati wemnakabo. (Makho 6:18) Loku kuphindze kusekelwe nanguletinye tincwadzi.

  Satimlandvo Josephus satsi, Antipasi “watsandza Herodiyasi” waze “wamcela kutsi ashade naye.” Herodiyasi wavuma, washiya indvodza yakhe futsi washada na-Antipasi.

• LiBhayibheli libika kutsi “bantfu baseJerusalema, nabo bonkhe baseJudiya kanye nabo bonkhe labahlala etindzaweni letingaseJordane beta kuye, [Johane], wababhabhatisa eMfuleni iJordane futsi bavuma tono tabo.”​—Matewu 3:5, 6.

  NaJosephus uyavuma kutsi “ticumbi” tebantfu teta kuJohane futsi “kwatitsintsa kakhulu loko lebekakufundzisa.”

Kuyacaca kutsi lesatimlandvo sangelikhulu lekucala, Josephus besiciniseka kutsi Johane uMbhabhatisi bekangumuntfu mbamba. Ngako natsi singaciniseka.