Imibuto Levela Kubafundzi
Kutawuyekelwa nini kushunyayelwa kwetindzaba letimnandzi?
Jesu watsi: “Letindzaba letimnandzi teMbuso titawushunyayelwa emhlabeni wonkhe, kuze tiviwe ngito tonkhe tive, bese-ke kuphela kuyefika.” (Mat. 24:14) Ligama lesiGriki lelihunyushwe ngekutsi “kuphela” kulelivesi nakuvesi-6 na-13, litsi teʹlos. Lisho kuphela kwelive laSathane nge-Amagedoni. (Semb. 16:14, 16) Ngako sitawuchubeka sishumayela tindzaba letimnandzi kuze kube kungaphambi nje kwekutsi kuphele lelive. Loku kushintja indlela lebesiyicondza ngayo lendzaba.
Ngaphambili, besitsi sitawuyekela kushumayela tindzaba letimnandzi nakucala kuhlupheka lokukhulu ngekubhujiswa kweBhabhulona Lenkhulu. (Semb. 17:3, 5, 15, 16) Besitsi loku kutawusho kuphela ‘kwemnyaka waJehova wemusa’ longumfanekiso. (Isa. 61:2) Besicabanga nekutsi labo labatawusindza ngekuhlupheka lokukhulu kutawuba ngulabo labakhombisile kutsi batinikele kuJehova ngaphambi kwekutsi kucale lokuhlupheka lokukhulu. Besibafananisa nemaJuda lasindza nakubhujiswa iJerusalema nga-607 B.C.E. Labantfu bebabekwe luphawu kusengaphambili lwekutsi batawusindza ngenca yekutsi bebakhonta Jehova futsi bakwenyanya lokubi. (Hez. 5:11; 9:4) Kodvwa loko akuvumelani nemavi aJesu lakuMatewu 24:14, lakhombisa kutsi kungenteka bantfu batawuba nelitfuba lekwemukela tindzaba letimnandzi kuze kube ngulapho sekusele kancane nje kutsi kufike kuphela nge-Amagedoni.
Lendlela lensha lesesicondza ngayo Matewu 24:14 ilungisa nendlela lebesicondza ngayo umlayeto lofana nesangcotfo lokukhulunywa ngawo kuSembulo 16:21. Kuyihlolisisa kabanti lendzaba kukhombise kutsi lemibhalo lemibili iyavumelana. Kanjani? Imphendvulo itfolakala endleleni bantfu labenta ngayo nabeva umlayeto weMbuso. Umphostoli Pawula wabhala watsi kulabo ‘labasindziswako’ lomlayeto utindzaba letimnandzi, ‘uliphunga lekuphila.’ Kodvwa kulabo labatitsa taNkulunkulu utindzaba letimbi, ‘uliphunga lekufa.’ (2 Khor. 2:15, 16) Bayawenyanya umlayeto weMbuso ngobe uveta kutsi lelive labalitsandzako libi, libuswa nguSathane futsi litawubhujiswa ngekushesha.—Joh. 7:7; 1 Joh. 2:17; 5:19.
Naka nekutsi lesangcotfo lesingumfanekiso sitawuba ‘sikhulu ngendlela lengaketayeleki.’ Kungenteka loko kuveta kutsi ngekuhlupheka lokukhulu umsebenti wekushumayela utawuntinyela kakhulu, lokusho kutsi libito laNkulunkulu litawentiwa latiwe kakhulu kunanini ngaphambili. (Hez. 39:7) Ngaleso sikhatsi, ngemuva kwekubhujiswa kweBhabhulona Lenkhulu, kungenteka yini kutsi labanye bakhangwe ngulomlayeto, kube ngatsi beva liphunga lelimnandzi? Mhlawumbe loko kutawenteka. Kungenteka batawukhumbula nobe beve kutsi sekuphele iminyaka leminyenti BoFakazi BaJehova bamemetela kutsi inkholo yemanga itawubhujiswa.
Nasifananisa nje, cabanga ngaloko lokwenteka eGibhithe ngemuva kweTishayo Letilishumi. Ngemuva kwekutsi Jehova “[sekehlulele] bonkhe bonkulunkulu baseGibhithe,” kwaba “nelicembu lelikhulu lebantfu baletinye tive” labahamba nebantfu bakhe. (Eks. 12:12, 37, 38) Kungenteka labantfu baletinye tive bacala kukhonta Jehova nababona loko Mosi lakusho ngeTishayo Letilishumi kugcwaliseka.
Nobe ngubani lotawucala kukhonta Jehova ngemuva kwekubhujiswa kweBhabhulona Lenkhulu utawuba nelitfuba lekusekela banakaboKhristu labatawube baselamhlabeni. (Mat. 25:34-36, 40) Sikhatsi sabo sekwehlulelwa njengetimvu sitawuphela ngaphambi nje kwekutsi kucale i-Amagedoni ngesikhatsi labagcotjiwe labatawube baselamhlabeni batfola umvuzo wabo wekuyophila ezulwini.
Lokucondza lokusha kuluveta kahle kakhulu lutsandvo lwaJehova lolukhulu nemusa wakhe lomkhulu. Kusebaleni kutsi “akafisi kutsi kubhubhe ngisho namunye, kepha ufisa kutsi bonkhe bantfu baphendvuke.”—2 Phet. 3:9.