Ammana Nooꞌne?

Yihowa hagiirsiisate ammana hasiissannonke. Ikkirono Qullaawu Maxaafi ‘ammana baalunku’ mannira heedhannokkita kulanno. (2 Tes. 3:2) Soqqamaasinchu Phaawuloosi iso xiiwannohu ‘bushunna shokkashshu manni’ daafira coyiꞌrino. Ikkollana isi wolu mannirano ammana noonsakkita coyiꞌrino. Mitu manni Kalaqaanchu Maganu noota leellishshannota xabbe leeltanno taje diammannanno. (Rom. 1:20) Wolootu kayinni mannu wolqara aleenni ikkino bisi noota ammantanno. Kayinni togoo ammana calla Yihowa hagiirsiissannota diꞌꞌikkitino.

Yihowa nooha ikkinotanna isi kaajjado ammana noonsarira “baꞌraaꞌra aannota” ammana hasiissannonke. (Ibi. 11:6) Ammana Yihowahu qullaawu ayyaani laalo widooti. Mittu manchi qullaawa ayyaana afiꞌrate Yihowa huucciꞌra hasiissannosi. (Luq. 11:9, 10, 13) Konne ayyaana afiꞌnanni gede assitannoti qara qullaawu ayyaaninni borreessinoonniha Maganu Qaale nabbawate. Hakkiinni nabbamboommore hiincanna loosu aana hosiisate sharrama hasiissannonke. Hatto assinummoro Yihowa ayyaani iso hagiirsiissanno ammana heedhannonke gede kaaꞌlannonke.