Ati Tenne Afootto?

Muse Higge giddo noohu xintu seeri hunda Israeelete mereero kaꞌanno gibbo tiꞌrate kaaꞌlinoni?

EE, KAAꞌLINO woti no. Hanni mitto lawishsha laꞌno. Marro 24:14, 15 togo yitanno: “Fiixiꞌne Israeelenniha ikko katamiꞌnera heeꞌrannohu manni gobba manni buxenna gadadame soqqamannoꞌneha hunkeensa ittinoonte. . . . Hunkeensa hakko barranni arrishsho eꞌukki uuyyensa. Hatto ikka hoogiro kayinni, Kaaliiqiwa higge raarte cubbo abbitannoꞌne.”

Lamalki sani K.A. mittu manchi togoori tuncu yeennasi shiqishiꞌrino eeggo borreessinoonni sanade anfoonni. Tenne sanade anfoonnihu Ashidoodi yinanni qooxeessiraati. Borro borreessinoonnihu dorunni loonsoonni uduunnichi aanaati; hakko borreessinoonni hedo aa hasiissannosi geeshshi gide uyikki gatinohu gatu loosaasinchi ledo xaado afidhinota ikkitukki digattino; sanade togo yitanno: “Shiimu barri albaanni soqqamaanchikki [eegamino manchi] gide gamba asse kai gedensaanni, Shobayi beetti Hoshabayu daye soqqamaanchikki uddanno adhino. . . . Ittanno arrishsho giddo ane ledo gide middanni hossinori baalu . . . coyiꞌroommori adda ikkinota farciꞌra dandiitanno. Ani mittoreno dihunoommo. . . . Ati [gashshaanchu] anera uddano qolsiisate giddeetu dinoe yite hedattoha ikkiro nafa, mararte tenne assie ballo! Soqqamaanchikkira uddanosi adhine heeꞌneenna sammi yitooti.”

Sayimeni Shaama yinannihu xaggete borreessaanchi togo yiino: “Kuni loosaasinchi shiqishiꞌrino eeggo uddanosi qollanni gede lowo geeshsha hasiꞌrinota leellishshanno. [Tini sanade] eeggo shiqishiꞌri manchi Qullaawu Maxaafi giddo noo higge roorenkanni Leewaawootunna Marrote maxaafira noota buxane miincannikki gede kultanno higge afinota leellishshanno.”